陸羽仁 BLOG 2014年2月17日
人生如搞公司６
2014/2/17 上午 09:45:24
網誌分類: 經濟
美股上周五造好，但交投異常淡靜，係今年最靜的三日之一。杜指大漲127點，收報16154點；標普500指數升9點至1839點。納指微升3點，造4244點。總結上周，杜指漲0.8%，標普500指數上升0.5%，納指跑輸大市，微升0.1%，但創了2000年以來新高。
值得留意的是，美股連續五日的交投量都偏低，反映投資者對後市唔係睇得幾通，採觀望態度。原因主要係今年以來，美股表現太出人意表，去年底，市場係咁唱好美股今年全繼續向好，誰知1月份大相對弱雞，踏入2月，市場又預期美股會有一個較大調整，結果又跌眼鏡，大市反彈，納指更創出千僖年以來新高。加上經濟數據時好時壞。
上周五，美國2月份的消費者信心指數初值81.2，與上月一樣持平，好過市場預期。資料顯示，消費者對現況睇法無預期咁好，但對未來的睇法則唔錯，好過市場的預期。1月份的工業産值則受汽車製造業有較大下跌拖累，下跌0.3%，與預期一樣，但遠差過上月的上升0.3%。
對於美國經濟數據近期唔靚仔，就業與零售消費數據都唔得，市場普遍的解釋係北美洲今年冬天天氣特別嚴峻，影響到好多經濟活動所致。達拉斯聯儲主席理費舍(Richard Fisher) 上周五表示，近排美國經濟表現疲弱，是天氣造成的，對聯儲局來说，不會影響退市的步伐。聯儲局對退市的堅持，顯示其對經濟前景信心爆澎。睇股市恐懼指標VIX指數由上周初的20點高位大幅回落至上周五的13點低位，投資者對後市又唔係咁無信心，相信係見到經濟未明朗，先做住「塘邊鶴」，唔敢太進取，但又唔會沽貨，形成近期的「乾升」現象。
我好留意美股走勢，杜指明顯上番16000點樓上，上周五收16154點，未來走向有三個選擇，上次高位是16577點，第一是向上突破，維持一個升市格局，第二是去番高位後回落，形成一個雙頂，第三是未到高位就回，明顯一個下行走勢，睇多半個月有答案。若美股夠強，港股無大礙，但若美股走出第二或第三種下行走勢，港股仲要尋底。
繼續我的人生大事話題。從努力做嘢、到儲備聚財、到投資增值、到與伴侶結伴都行，幾樣事情唔係缺一不可，但你缺上兩樣都幾不可啦，即係做嘢無大成就，勤行儲錢投資聚財，都可以補到。若你又唔努力，又亂炒，又有個大花筒伴侶，你呢世都無錢剩架啦。又例如搞間公司，做本業又唔得，又使得多無乜保留利潤，投資又唔得，CEO同大老闆仲日日打交，呢啲公司俾都唔好買啦。上述四樣嘢如一個檢查表，可以用來查吓自己得唔得。
網友davyluk問起:「小弟現在25歲!學識不多,只能打一份牛工,幸好有女友互相扶持,二人合力儲錢望上車建立小家庭!我跟她都很希望在下年即2015年能夠上車，(因我都認為下年是好時機,怕一但錯過機會就望塵莫及,因為小弟覺得一但樓市下跌過快,政府隨時撤銷雙辣招,大陸的資金又會流入香港買房地產,之後又不知要等多少年才能上車,而且低息對於上車時壓力測試都比較易通過,女友亦比較急想上車).我跟女友常說儲就有機會!不儲就甚麼機會都沒有!但我知道不能只靠儲錢就會能上車(因為二人搵錢都不多,都只是靠節流辛辛苦苦儲下來),所以我常常都想靠投機來增值那筆資金,女友是穩陣型我則是進取型,但投資投機的事都是我負責!」
「早年投機了幾次,幸好都能抽離止蝕,損失不多!但女友對我的投資投機信心近乎全失,現在資金有2分1做了人民幣定期,4分1在IBOND,都算有幫忙增值!還有4分1我就在尋覓股票來投機嘗試增值!」davyluk問我有何好選擇。
財不入急門，有時心急去投機，手震震，無好結果。網友yy太用自己的經歷，代我答了 davyluk，yy太話:「davyluk，您的困擾我都經過,時為1993-5年.
我為了要金錢增值. 結果將1/5首期, 個時不是太多首期比例. 買了股票.一年後輸了9成. 財不入急門. 技不如人,不懂止蝕. (當然唔識陸SIR), 看報紙, 信財演. 好像買了廣信, 執左個間.真的哭. 怕上唔到車. YY生, 安撫了我很久. (不過, 個年多2人打工之儲蓄, 己超左個數). 所以仍然可上車. 裝修呢. 就沒有多少預算啦。」
「好記得, 當年為了慳$100送一塊小雲石櫃面的送貨費, 借了一輛木頭車, 同YY生,合力推了幾個街口, 搬上樓. 身水身汗,雞手鴨腳, 不理別人眼光, 沒有埋怨辛苦, 每一個動作, 每一個眼神,都是喜悅. 行了良久, 四目交投, 相視, 會心微笑. 因為是建設不止一個小單位, 而是"我們的家". 當時, (正如陸SIR 文章說2人努力) 我們都很快樂, 因為目標理念一致, 思想簡單, 對未來充滿希望. 快樂其實真的不需要有好多錢. 」
Davyluk，你絕對可以重覆YY太的故事，樓市只能估大方向，好難估細時機，所以我並唔覺得明年一定係一個好時間，先睇吓樓市係唔係有顯著回落先啦，有咪買囉，無再等吓啦。剛睇到一個將軍澳慧安園的成交，如今成交價還比4年前貴咗一倍，四年前仲係200萬不到，而家叫做跌咗都400萬以上，若你買貴咗200萬，真係做多廿年都補唔番。
Davyluk，要與女友傾好，要同步，不用太投機，但我覺得好似你心急買樓多過你女友心急，你投機在2015年這個時間線上，點解一定係2015? 我反而著眼是在價位，唔回番咁上唔好買。一邊儲錢一邊等，都樓價跌到你負擔得起才買，而唔係想炒股賺多啲等夠錢買，你咁心急，正常一隻大股俾你低買高賣，你都會犯錯。
我很喜歡YY太那幾句:「目標理念一致, 思想簡單, 對未來充滿希望. 快樂其實真的不需要有好多錢.」
陸羽仁
回應(6) 我想回應
陸羽仁 BLOG 舊文