陸羽仁 BLOG 2014年2月7日
新手莫高追
2014/2/7 上午 09:47:36
網誌分類: 經濟
股票跌得多會反彈，係千古不易的道理，問題係只是反彈，還是轉勢回升而矣，美股昨日就出現咗像樣的反彈。
美國上周首次申請失業救濟人數報告好於預期，市場對今晚公布的1月非農就業數據持樂觀態度。迪士尼又交出靚靚成績表，投資者對股市的恐懼大為舒緩，股市恐懼指標VIX指數由接近20點，大幅回落至17點水平。另外，日圓兌美元繼續回軟，跌番去102水平樓上，令到借日圓買美股的資金面壓力減低，有更多資金得以流入股市，而歐洲股市大彈1.5%，亦為美股上漲推波助瀾。
美股昨日一洗近日頹氣，杜指大幅反彈188點，收15628點，以接近全日最高位收市，重上200天均線，標普500指數漲22點至1773點，收復了關鍵的100天均線(1770點)，單日漲幅係7個星期以來最好。
美國勞工部公布，對上一周的首次申請失業救濟人數下降2萬人至33.1萬人，好過市場預期的33.7萬。美國12月的非農就業人口增加只有7.4 萬人，遠差過市場預期的增加19.6萬，更係過去近3年以來最低。而周三公布的1月ADP私營部門人數增加17.5萬人，亦遠差過上月的22.7萬人，使到市場對今日公布的非農就業數據唔係好樂觀。市場預期職位增加18.5萬個，失業率維持在6.7%水平。而昨日公布的失業救濟數字又唔係唔差，令到市場對美國就業市場有番些憧憬，市場情緒亦有改善。
另外，全球最大娛樂公司迪士尼昨日派成績表，去季純利18.4億美元，較去年勁升33%，好過市場預期。股價大幅抽高超過半成，係表現最好的杜指成份股。迪士尼咁勁亦帶動零售股造好，標普零售ETF漲2.4%。
標普500指數中佔重最高的科技板塊，亦造得唔錯，升1.2%，惟近排最搶眼的Twitter，就認真唔掂。昨日收市後公布業績，營收有所增長，但每月活躍用戶數量不及預期，昨日暴跌24%，險收50可美元大關，但在延長交易時段，繼續向下，收報49.82元。
要留意美股係唔係搵到底，可唔可以順勢上番，抑或彈完再向下，而家機會一半半。
網友傷心人有段留言，發人深省，佢話「我已經26歲, 但係股票市場實在輸左好多錢, 之前買股我跟本係亂買, 實在十分後悔, 我依家都仲有70%股票, 係高位買, 蝕緊15%, 最近實在經常反思自己買股票原因, 其實都係想資本增值, 希望馬年開始我搵到自己投資既方法. 我會睇多D書認真地投資, 同多睇陸先生的文章從中學習, 絕不放棄。」
我唔想後生仔亂炒股，怕佢地輸一世，但係早輸比遲輸好，早輸，肯認錯，以後唔再犯，就有機會學懂如何投資增值。我有一個朋友，係會計師，畢業無耐搵份好工，收入不俗，很愛炒股，但炒了幾年，遇上89股災，一舖輸哂所有錢，佢就戒炒股，以後買股只作長線投資，另外就買樓，坐住唔放，而家近50已上岸。
傷心人無講輸幾多，點樣輸，但聽佢口氣，都係在股市熱市買股，或者信錯消息接咗貴股，佢話70%都係在高位買，可見入市時間好差。這是散戶一個通病，隨大市氣氛而買，高位入，個勢開始轉又唔知，仲買多啲溝淡吓，跟住大插落嚟，到低位，輸好多，市場氣氛好差，人人都話就嚟大爆炸，就嚇到沽貨，高買低沽，咁就輸錢，這是講大股。另有好多細股跌咗上唔番去，你高位買咗永不翻身。
傷心人可以學睇股票的基本因素，睇大股，在跌得較多時買，升到咁上下沽番出去，唔識睇個股，睇指數基金，學學吓你會識架啦。用心，唔好人雲亦雲，才會成功。
陸羽仁
回應(1) 我想回應
陸羽仁 BLOG 舊文