金融High Tea 2014年2月4日
馬年福長發小財
2014年02月04日
祝大家馬年發小財。為甚麼不祝大家發大財，因為外圍環境不是那麼好，不是那麼容易發大財。
你睇車公點講，初二鄉議局主席劉皇發為香港今年求得支中籤，籤文謂「福無私與皆天賜，禍不空生自有招；一片婆心能積善，自然福長禍潛消」。我有一個觀察，過去車公籤文講政治好準，例如那些年香港選特首時，兩句「何為邪鬼何為神，神鬼如何兩不分」，簡直精警無限。但我以車公籤文對應政治，發覺命中率一半半啦。但我好喜歡車公今年那一句「自然福長禍潛消」，對應馬年較動盪的時勢，希望自然增長，食10%，當然好過冒大險去博食100%啦，馬年唔似係大旺可以食大茶飯之年，低買高沽較為上算。
蛇年虎頭蛇尾
上周四港股蛇年最後一個交易日只有半日市，恒指一度急跌近400點，之後跌幅逐步收窄，收市跌106點，收報22035點，險守22000點。大家似見個市跌得太多，從低位反彈等馬年，但香港放假期間美股回咗，想開紅盤不易。總結港股蛇年表現，亦成條蛇咁，曲曲折折。恒指由年頭的23215點向下走，至年中跌穿19500點，及後反彈至12月的24111點，又碰正內地經濟進一步放緩及聯儲局退市，蛇尾跌番落嚟，應晒「虎頭蛇尾」呢句話。
恒指全個蛇年跌1180點，跌幅超過半成，國企股就悽慘好多，勁插1800點，跌幅更高達15.7%。藍籌及國企股跌勢慘烈，下跌的股票超過80%。藍籌股跌得最傷嘅係百麗國際(1880) ，收8.38元，全年勁跌52.3%；跟住係中煤能源(1898) ，收3.88元，跌51.1%；之後係中國神華(1088) ，收20.05元，插32.1%。而大贏家係科網股及賭業股。蛇年跑第一嘅係銀河娛樂(027) ，收76.3元，全年大漲1.27倍；第二係騰訊(700) ，收543.5元，升1.02倍；第三亦係賭股，金沙中國(1928) 收59.85元，升近71%。
蛇去馬來。睇番過去三個馬年，兩好一壞，對上兩個馬年，恒指大升超過兩成，上一個就非常唔掂，跌近15%。前瞻馬年大市走勢，預計會好似跑馬仔咁，非常之「chok」，尤其係上半年，大市沽壓會比較大，大家要捉穩韁繩啦。壓力源於壞消息多，好消息少。壞消息關鍵在於美國聯儲局逐步退市的部署。新興市場匯市、股市以至經濟最近爆的大鑊，主要源於聯儲局退市，令此前炒旺新興市場的熱錢回流美國。
儲局逐步收水
聯儲局在1月尾剛開完會，市場原本預計聯儲局會考慮一下新興市場動盪狀況，在會後的聲明中會暗示吓，如果新興市場情況太差，影響美國的話，會暫停收水，或者至少講句「近期新興市場波動」之類，以顯示佢關注事態，點知聯儲局的聲明對新興市場提都唔提，顯示聯儲局非但對新興市場漠不關心，更唔認為會影響到美國，對美國經濟復甦，一副處之泰然、信心十足的態度，意味着當局會繼續擰緊水喉。不過，到收水(Tapering)效應消化晒之後，又要睇聯儲局幾時加息(Tightening)啦。
內地經濟放慢
另外，中國的經濟，尤其係上半年，唔見得好好。早前公佈的匯豐中國製造業指數(PMI)跌穿50的枯榮分水線，假期間中國公佈官方1月份製造業採購經理指數(PMI)為50.5，較12月回落了0.5個百分點，雖符合市場預期，仍為六個月以來低位，顯示中國經濟經過去年下半年衝了一段後，動力正減弱。唯一剩餘的好消息就只有2月底的上市公司的全年業績公佈，到時大市或者會借勢彈番少少。在壞消息多過好消息的情況下，大市上半年恐怕會係反覆尋底的格局。
當然啦，大市跌得多的時候又唔排除會反彈吓。正如早兩日碰到位散戶，佢興高采烈咁話喺70蚊撈到銀娛，上日升到76.3蚊，執到超過6蚊。股場中，任何時候，都有人賺到錢。你問我家可唔可以入市？我會反問你長揸定短炒？如果係短炒，一見跌得多就可以買，博反彈。好似呢位散戶，見到銀娛插得夠低，就可以入市撈底走一轉，執幾蚊就可以沽啦。市跌得較深，唔係博反彈賺幾個巴仙，係博見底賺10、20%，但如今個市以全年計恐怕尚未見底，假設今年大市在20000點至25000點中間走動，家22141點，仲有水位向下。所以若果你入貨睇一年的話，大市跌得未夠深，反彈幅度唔夠大，升5%、10%你唔想走，食唔到反彈浪，小心再向下時又中招。
講番銀娛、騰訊這些股王，究竟仲買唔買得過呢？始終都要講番剛才提過嘅，這些股票去年已經升得咁多，只適宜短炒，唔係咁適宜現價位買入長揸，因為長揸最好入得平，家呢啲股票唔平。例如上面提過的散戶，70蚊買咗銀娛，升唔到理想的食胡位跌番落去(散戶的食胡位也經常變)，改為長揸，得唔得呢？我又覺得唔係幾得喎，因為牽涉控制風險的問題，這些已經升得咁高的股票，升與下跌的機會都係五五波。做投資，永遠都係一個值博率的衡量。
同一隻銀娛，短炒與長揸，佢嘅值博率會唔同。以短炒計，例如銀娛最近由最高的84.5元跌到70元，在急插後短期內再跌10%至63元的機會係細過反彈10%至77元(記住我講係一星期的短期)，所以在急跌後撈底短炒的值博率比較高，可能係70%比40%，70%可彈番到77元，30%會跌到63元，只要定好止蝕位63元輸10%會投降，可以一博。但你同樣係70元入，開頭短炒，買買吓又變長揸，咁就變咗議題，以長線投資而論，由於股價已經升得咁高，升與跌的機會可能都係一半，值博率就會唔同，要銀娛再升50%要去到105元，或者跌50%是35元，粗略講105元和35元的機會都係一半半，差不多，所以長線死揸，又未必得。我所謂的長線，係指三到五年，誰知道澳門賭場咁不斷起下去，未來三年還可以維持現在的增長，增長一放慢股價就回，百麗當年因為大炒內需股而急上，如今都捱緊。
注意封面效應
這裏我想到老外分析界所講的「封面效應」。但凡某行業好成功，某公司做到好成功，上晒報紙雜誌封面，全世界都知道。這家公司的成就街知巷聞，已差唔多到頂，前景亦差唔多去到盡頭啦。事實上，賭股和網股近年升成咁，唔多唔少有啲「封面效應」啦。雖然升開有條路，再升多一年半載都唔奇，但買呢啲股開始要有戒心，保持短炒心態好啲。
陸羽仁
金融High Tea 舊文