中環在線：保利蘇富比春拍撞期常玉《聚瑞盈馨》估價逾4,000萬 - 李華華
【《聚瑞盈馨》 1950年常玉】 估價：4,000萬元
每逢4、5月係各大拍賣行舉行春拍嘅時間，香港蘇富比與保利文化(3636)旗下保利香港將於4月初同期在港舉行春拍，兩間拍賣行喺中國當代藝術方面都有重要拍品，並對拍賣成績感到樂觀，唔擔心受到中央打貪或環球經濟疲弱影響。
蘇富比將於4月4至8日喺會展舉行春拍，其中，現當代亞洲藝術與20世紀中國藝術兩場拍賣，將會拍賣超過200件拍品，總估價超過2.4億元。常玉一幅《聚瑞盈馨》屬重點拍品，估價超過4,000萬元。
常玉1921年移居法國，蘇富比20世紀中國藝術部主管陳秀玉指，呢幅屬於常玉晚年嘅作品，當時佢相當貧窮，甚至冇錢買布作畫，惟有想方法，利用纖維板創作。蘇富比曾於2012年秋拍，以3,090萬元拍出常玉另一幅《聚瑞盈香》。
陳秀玉認為，市場對呢班20世紀旅居歐美嘅中國藝術家嘅作品有一定興趣，佢哋嘅作品融合中國水墨與西方油畫嘅特色，填補一個時期嘅文化藝術。
【蘇富比春季拍賣品】
【《晨禱》 1996年陳逸飛】估價：2,500萬至3,500萬元
保利：無懼打貪
至於有「中國蘇富比」之稱、剛上市嘅保利文化，旗下保利香港就於下月6至7日喺君悅舉行春拍，約有2,000件拍品，總估值7億元。保利香港執董張益修認為，亞洲不斷有新客戶參與拍賣，對拍賣成績感到樂觀，更唔擔心中央打貪帶來任何影響，拍賣始終屬於文化收藏活動咁話。
舊年蘇富比秋拍以1.8億元拍出曾梵志嘅《最後的晚餐》成為一時佳話。保利春拍亦有曾梵志《面具系列》一幅畫。據講曾梵志於2000年只畫過3、4幅長條型油畫，且看能否再創佳績。
■張益修(左二)表示對拍賣成績感到樂觀。黃永俊攝
【保利春季拍賣品】
【《面具系列》 2000年曾梵志】估價：1,500萬至2,500萬元
【《命運無聲降臨》 2011年村上隆】估價：780萬至1,000萬元
李華華
mailto:LiWaWa@AppleDaily.com
上一則: 樂香園：不要小覷烏克蘭事件 - 密西比
下一則: 中環在線：潘玉良畫作珍罕堪稱博物館級 - 李華華
中環在線 - 李華華 舊文