金融High Tea 2014年3月18日
兩罪俱發
2014年03月18日
屋漏總逢連夜雨，網股跌起上嚟有條路，繼騰訊(700) 搞虛擬信用卡被中央暫停後，內地科網巨頭阿里巴巴棄港赴美上市，早前入股的兩間本港上市公司顯著受壓，兩股同挫約一成，文化中國傳播(1060) 下瀉10.5%；中信21世紀(241) 亦挫9.6%。另一方面，人行叫停虛擬信用卡支付，下發草案限制第三方支付額度，支付概念股向下。
「雙馬將車」無得玩？
阿里對頭、本港科網股龍頭騰訊旗下微信支付發展或受阻礙，拖累股價連跌四日，再挫3%，為跌幅第二大藍籌，拖低恒指61點。小型支付股跌勢更見慘烈，環亞智富(1390) 、神州數字(8255) 分別插5%及6%；中國創新支付(8083) 仲誇張到激瀉20%。
最近一個月，科網類股份輪流炒作，一大炒作因素係騰訊同阿里巴巴兩個老闆玩「雙馬將車」帶動。假如馬雲的阿里巴巴決定唔嚟香港上市，注意力可能轉移咗去美國掛牌的工作，有可能令到呢類股份少咗個戲碼，特別係阿里本來話上半年爭取掛牌，大家憧憬炒高呢類股份攞個好價錢，家呢樣嘢發生機會自然少咗。
係網股「兩罪俱發」下，搞到個市無晒氣氛，雖然大市上周跌得急，依然無力反彈，恒生指數跌65點，報21473點，連挫四日；國企指數則隨內地股市造好，收報9333點，漲34點，成交縮至557.8億元。
新世界發展(017) 續受供股及私有化新中(917) 消息困擾，上周五急跌14%，昨日繼續受壓，新世界收造7.81元，挫6%，成為跌幅最大藍籌；新世界中國報6.49元，跌2%。對於新世界供股，陸羽仁話不妨用反向思維，考慮參與供股，今日不妨再拆吓局。
新世界近年不止一次供股，高位入貨的小股東自然怨聲四起。有中環茶友聞訊則陰陰嘴笑，表示歡迎，因為他在上一次供股時，曾經係市場買入「威屎」參與，之後股價回升，佢逐步出貨，家差不多沽咗六成，假如現在再供股，佢又有機會再補倉，故此雖然家佢手頭的股份已跌回當年入貨價，但佢都唔介意大股東「抽水」。茶友話，你睇過去幾年鄭家動作多多，都知佢哋鍾意玩財技啦，咁有機會低買，高位自然就要沽啦，唔通同佢玩過世乎？
夜長夢多 新中食胡
今次新世界供股，供股價6.2元計，同一年高位14.34元相差一大截，佢喺股價接近一年低位先嚟供股，變成股票大平賣，呢招的確好唔受歡迎。本來，過去幾個月，新世界股價跌、新世界中國股價升，好多人以為係炒高配售新中套現兼減持，點知結果嚟一招低價供股、高價私有，公司主席鄭家純咁高招，真係無幾多個人會咁諗。由於家新中市值仲高過新世界，係仔仲大過阿媽下，新中小股東真係應該諗吓沽貨套現，好過等私有化夜長夢多啦。
大市負面氣氛瀰漫，原本好多新股想趕上市，現在部份都打退堂鼓。今日武漢主題產業園開發商光谷聯合(798) 今日(18日)起公開發售，其共發售10億股，招股價為0.83元至1.09元，每手股數為4000股，每手入場費為4403.95元。光谷聯合將於下周五(28日)掛牌，法巴為上市保薦，公開發售部份將於本周五(22日)中午截止。
陸羽仁
金融High Tea 舊文