一周三件：第一上海值博 - 錢雋
■筆者分析指，第一上海受惠國策，前景亮麗。
第一上海(227)上個月單月成交股數，創咗2007年8月市傳港股直通車後，七年嚟嘅新高，唔似煲冇米粥，第一上海係等爆邊。
2007年5月，港股大旺，恒指扯到上21000樓上，創咗新高，第一上海當月成交10.93億股，股價單月翻咗一番。再喺同年8月，市傳港股直通車，第一上海單月成交10.1億股，兼一支箭挾到上9月的4.18元，計由5月1.02元起步位，五個月就升咗3.1倍！
受惠國策前景樂觀
上個月，香江上海講掂數，股市搞港滬互聯互通，第一上海單月成交8.1億股，創咗直通車傳聞後新高，唔似煲冇米粥。咁睇，滬港互聯互通仲傾緊細節，以市場面去睇，一有消息就滲出嚟，券商股實彈。而隨住呢壇大製作落實，中長線睇，肯定刺激港滬雙邊交投，本港券商，有機會多咗兩邊生意造。更何況，第一上海打正上海招牌？
再講，阿爺大方向持續性推出更多利好證券政策，又城鎮化keep住大型基建、力谷電子消費，加埋國企實施混合制模式，所有政策措施，已經為未來幾年，中、港股市爆升，重演1997、2007年翻版，播好曬種。大圍好景，第一上海一樣有運行。
第一上海最新PB得0.43倍，場內有中資背景嘅申銀萬國(218)同埋海通國際(665)，PB全部都係喺1倍嘅樓上。而本地薑耀才證券(1428)1.7倍PB、時富(1049)0.58倍、英皇證券(717)0.5倍，第一上海嘅PB係最平嘅券商股之一。
今勻採用長短棍策略，一轉長揸，博嚟緊日子有大龍鳳，一轉短打第一上海，炒佢低殘PB，第一上海輕輕追返上時富近0.6倍水位，現價(0.84元)都要升37%，到1.15元。
錢雋
細價股專家
本欄逢周二、三、五刊出
上一則: 投資一周：咪再掂大家樂 - 周顯
下一則: 智取大市：股市同拍拖差唔多 - 晉佳
一周三件 - 錢雋 舊文