一周三件：合富輝煌值博 - 錢雋
■扶偉聰任主席的合富輝煌，筆者認為值博率高。資料圖片
噚日主打中國玻璃(3300)曾經講過，取消內房限購令嘅呼聲越嚟越高，呢個金剛箍一旦放鬆，主打內房物業代理業務嘅合富輝煌(733)，亦肯定係肥仔水。同場內同瓣數嘅美聯物業(1200)比較，合富輝煌又平咗成截，要睇實。
合富輝煌上年度嘅純利近2.2億銀，增長接近16%，家陣嘅PE得5倍。又集團喺呢個一年低殘位，現價(2.24元)PB，跌到得番0.7倍。場內亦有涉及祖國同瓣數嘅美聯，上年成績單見紅，冇PE，家陣PB上到1.9倍，合富輝煌又平咗九條街。
合富輝煌上年應收賬8.8億銀，相當於營業額23.5億銀37%，比2012年39%仲要有所改善。而集團上年尾所揸現金，高達5.5億銀，另只得4,900萬銀行借款，就算計埋可換股票據2.2億銀，合富輝煌淨現金仍挨近3億銀。
又報載合富輝煌今年頭一季，累計一手同二手物業代理成交面積，分別增加咗60%同40%。單係睇3月份，一手同二手代理成交面積，亦按年增加60%同超過1倍。
雙頭馬車惹憧憬
睇到嘅資料和數據係，喺嗌曬救命嘅日子，合富輝煌資產質素冇變壞到；而新一個財政年度，集團個頭亦開得好靚仔。再講，合富輝煌上年尾再開多瓣財仔業務，整多頭馬車，實行雙線發展。中小企借貸需求大熱，呢瓣亦應該掂過碌蔗。
專業評估，合富輝煌今年純利，可以逆流而上，增長33%到2.94億銀，PE跌到得4倍。呢個業績評估，亦暫時冇計到阿爺取消限購令潛在因素，但集團預測PE，已經好吸引。冷灶煲合富輝煌，PB輕輕上到1倍，仲未有耐追到美聯PB，但講緊已經要升40%過外，到3.14元，而目標價嘅PE，仲喺5.5倍超殘水位。
錢雋
細價股專家
本欄逢周二、三、五刊出
上一則: 投資一周：政府欺騙公眾 - 周顯
下一則: 智取大市：炒完股要點事後煙 - 晉佳
一周三件 - 錢雋 舊文