魚樂無窮：常茂淡市破旗要尊重 - 唐牛
■芮新生任主席的常茂生物股價近期逆流而上，成為淡市中嘅奇葩。資料圖片
港股全日波幅唔夠100點，戰友好似十個救火的少年咁，一個又一個離場，形成惡性循環。撇除石藥(1093)大手上板，主板成交400億銀唔夠，仲少過星期一，苦了一班日日焗住對住大利市機嘅經紀戰友。
三大賣點有睇頭
雖然生意淡薄，港股大莊家港交所(388)股價卻出奇地強，比著以前咁少成交，港交所一定陰乾式下跌。當其他疑似滬港通受惠股，如大折讓H股相繼倒下，港交所依然企穩140蚊大關，背後支撐力量不容忽視，當滬港股正式啟動，隨時有好戲睇。
常茂生物(954)早前公佈業績後見光死，一度由高位調整近三成，低位喘穩後，近期逆流而上，成交亦漸見動力，成為淡市奇葩。公司為主要有機酸生產商龍頭，產品用於食品添加劑、化工及醫藥行業，三大賣點發熱發亮。
賣點一︰績優前景佳。去年全年盈利6,999萬人仔，按年增長42%，現價市盈率9倍，兼有逾3厘息；連雲港生產基地將於下半年投產，新增年產能達一萬噸，盈利動力大增。
賣點二︰細細粒易炒。最新H股市值僅2.8億銀，主要股東持股五成，意味街貨僅1億多，淡市已見資金部署，一旦炒鬼回歸，要炒上可謂易如反掌。
賣點三︰圖表有突破。自5月中見底後，曾有一大棍升幅，經過一輪整固，噚日再破旗而上，靚絕！如能突破1.6元阻力區，有望再度挑戰今年高位1.78元。
唐牛
上一則: Follow Me：華瀚盈喜在望博反彈 - 高彰坡
下一則: 股場放大鏡：碧瑤突爆升大有內情 - 歐陽風
魚樂無窮 - 唐牛 舊文