異動空間：一買即艇點算好
市況悶到發慌，波幅細交投疏，當見股份異動衝入，隨時就係當日最高位，皆因人心虛怯，勇者難求，形成股份好快就冇力，炒家一見氣勢減退就極速食糊，近日唔少異動股，陰陽燭的上影線勁長，如上周五的開達集團(180)就是好例子。即買即中伏點算好？首先心裡一定暗罵自己，為何如此冒進？眼見沽盤湧現，股價不斷回落，肯定十分沮喪，望著總資產插水，心中定有此疑問：應否止蝕換馬？右邊的天使說：唔沽明天可能反彈呢！左邊的魔鬼卻搖頭：咁跌多幾日點算，到時咪輸仲多？樂觀、恐懼在內心角力，如何在兩者間決擇，就是股票難炒之處。
不妨問自己幾個問題，買之前有否做功課，還是只係見明燈魏力拙作就衝？落注佔總資產比重幾多？股份是大成交向下抑或只屬乾跌？自我研發可買大點，這是對自己投信心一票。如只是聽冧把圖都未望就清兵上身應該減持，當買個教訓、清醒一下。如股份只是乾跌即較近日成交少很多，多數是震倉嚇散戶；反之就是危險訊號應極速離場。跟報紙冧把買股票不是錯，但甚麼價位買、分幾多注買、買幾多仍要自行決定。市況飄忽，還是小注好了。
魏力
http://www.facebook.com/2012jason
魏力
異動空間 - 魏力 舊文