中環在線：
港交所14周年酒會佔中成熱話
周松崗：有應急方案
■周松崗(右)講明港交所有佔中應變方案，隔籬嘅李小加唔使咁愁喎！謝榮耀攝
港交所(388)噚日舉行上市14周年酒會，今年唔似前兩年咁多事幹，前年港交所喺酒會上宣佈以過百億元買倫敦金屬交易所(LME)，舊年就接住LME年會一齊搞，好不熱鬧，今年金融界嘅焦點放喺佔領中環同埋年底推出嘅滬港通，港交所主席周松崗當然唔希望見到佔中發生，但係都有應急方案咁話。
港交所今年喺金鐘一間五星級酒店舉行周年酒會，捧場者眾，現場應該有千名賓客，部份遲來者差啲入唔到酒會現場㖭。周松崗喺酒會開始前，以招牌笑容回應傳媒幾句提問，指唔希望見到佔中發生，因為會影響到國際投資者嘅信心，之不過，港交所亦都已經有應急方案，一旦發生亦可以令到市場嘅幹擾減到最低。
至於投資者同埋大小經紀行都引頸以待嘅滬港通，佢話市場反應好正面，𠵱家已經有216間市場參與者表示有興趣，其中177間仲話已經為10月正式推行滬港通做好準備。
否認斟阿里第二上市
見到港交所行政總裁李小加，大家自不然又要問佢有冇諗計搵番阿里巴巴來港上市，事關佢之前積極推動市場就阿里想要嘅合夥人制進行討論，佢噚日就話，冇討論過搵阿里巴巴來港作第二上市。
至於金發局早前建議本港應容許公司以不同法律架構上市，可考慮設立唔同類別市場去配合唔同投資者嘅需要，李小加亦講得比較保守，指香港屬法治社會，要改動法規唔係易事，但認同所有方案都有討論空間。呢個標準答案，明顯係諗過度過先講喎。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文