金融High Tea 2014年6月24日
呢個暑期好翳焗
2014年06月24日
內地公佈經濟數據比預期理想，開市初段一度升二百點，點知呢個就變做越位陷阱，唔知係好友諗住揮軍進攻被人快速反擊，定係大戶部署好抽高引好友落疊，總之淡友一反攻就埋門，連波都入埋?。昨日個市高低波幅成六百點，係悶戰中突然嚟個快上快落，淡友呢次閃電戰可以話一擊得手！
其實未開市陸羽仁都感覺到大勢唔係咁舒服，我早上在港台第二台開咪都話要小心，個市從低位升咗1700點，之後在高位橫行唔想上，向上值博率唔多，向下走水位有相當，當時對聽眾講呢個暑假好翳焗，最好都係少做事唔好買錯股，多攤唞，得閒歎吓冷氣好過。
陸羽仁未開市就叫人唔去跟美股創新高而入市買港股，結果不幸言中，當時咁講其中一個理由係美股創緊新高，但港股明顯跟唔上，以龍頭股騰訊(700) 為例，係未拆細前造過相當於129.2元的歷史高位，呢輪納指抽上無跌過一樣，但騰訊跟唔足，最高係6月12號造出的119.5元，同高位比仲相差7.5%。騰訊表現係港股中已經唔算差，但依然跟唔足美股走勢，可見個市係高位浮浮沉沉之餘，強股都上唔到高位，可見市底其實唔係咁強。
升完跌阿媽係女人
昨日港股單日轉勢，好大機會形成一個下行之勢，從個圖表睇，指數喺高位形成四個小頂，家破唔到高位，一吓咁跳水向下，梗係唔靚仔囉。但係一嘢直插，還是反覆向下，仲要睇美股。若然美股再試新高未回吐，咁港股仲有可能會彈吓，不過即使係咁，都係賣貨機會多過買貨機會。我認為減倉過暑假好啲，除了外圍，本地短期環境無乜好消息，政治係亂局，零售唔慌好，阿爺似會借啲意減自由行，要炒跌呢啲都係好藉口。
昨早公佈的匯豐中國6月製造業採購經理人指數(PMI)初值升至50.8，數字高過預期，顯示內地製造業重返擴張水平，但都頂唔住個市，事後孔明咁去講，市場早前已消化內地經濟回穩的消息，內地股已經反映晒。消息公佈後恒指照插逾三百點，逼近全日低位，收報22804點，跌389點；國企指數收報10198點，跌197點，成交增至580億元，以咁嘅跌幅計唔算多，頗有趁買賣兩閒殺倉味道。
藍籌普遍受壓，騰訊由升轉跌，造114.2元，跌1.4%，科網手遊股午後沽壓沉重。阿里巴巴去美國上市，已經聽到國會對佢以同股不同權方式上市有意見，雖然估計政客噪音阻唔到佢掛牌，但就會對佢定價同反應有影響。阿里上市係美股7、8月的重頭戲，股民當然要留意住美國方面搞邊科。
港股領插股份之一係中資金融股，建行(939) 跌2.2%，工行(1398) 跌1.8%，都多過大市跌幅。有說法係內地公佈數據較好，反映中央微刺激收效，下半年可能會減少動作，未必會全面降準，有人又話驚內房劣勢未除，擔心內銀股違約風險增加。簡單啲講，中資金融股由低位普遍升咗唔少，內地金融調整點講都仲差一大段路，無理由當乜事都無再大炒特炒，所以佢哋升到咁上吓就有回吐，都係阿媽係女人的道理啦。
新股繼續熱鬧，今日輪到內地一站式媒體應用解決方案供應商世紀睿科(1450) 招股，招股價介乎1.08元至1.38元，入場費2787.82元。集團首席運營官梁榮輝表示，集資部份將用於提升活動轉播服務能力。
陸羽仁
金融High Tea 舊文