異動空間：幾時撈底勝算高
恒指「穿頭破腳」大陰燭殺落，感覺是極唔對路，成交配合增至580億元，散水味甚濃。為安全計建議戰友先減倉一半，如失守22500點就清貨。個市究竟跌乜？有說是強國製造業PMI表現好，意味中央放水力度將會減弱；有指是「和平佔中」憂慮升溫，大戶先行沽貨。
港股悶咗成個月，波幅指數跌至歷史低位，淡友就趁機進攻，仲要揀午後最靜嘅時段出擊，擺明有組織、有目的，如今得勢自然不饒人，期指下周結算前勢將窮追猛打。跌市原因不重要，炒股最緊要知方向，並順勢而行，短線的策略應是追沽及減持。然而，沽埋呢浸世盃都就快完，7月中之後港股有機止跌回升。
協鑫新能源(451)股份一拆六，將於下周一(30日)生效，股價本月初起動，由9蚊炒到13蚊，其後回到11蚊有支持，昨逆市反彈6%，收報11.62元。以昨收市價計，拆細後每股1.94元，股份深度提高，炒味將會更濃，利好股價表現，本周或有春江鴨偷步入場，不妨留意。該股市值僅62億，主攻光伏電站及天然氣，前景有睇頭，獲保利協鑫(3800)入主更是大炒特炒的理由。
魏力
http://www.facebook.com/2012jason
魏力
異動空間 - 魏力 舊文