中環在線：疏堂親戚雲集
Sinomax高層一家親
■Sinomax係家族生意，董事局中人都係有親戚關係。
■中國虎都創辦人郭建新(右)同阿仔郭漢鋒，父子兵上陣。黃偉傑攝 本港唔少上市公司都係家族生意，多數由阿爸、阿媽同埋仔女等直屬親戚包辦董事局董事職位，賣健康枕頭嘅Sinomax(盛諾，1418)今日公開招股，翻閱招股書「董事及高級管理層」，驟眼望落去，大都唔同姓氏，唔似有關係，細閱先發現係有親戚關係，堂兄弟、表姨、表姨甥都有，睇招股書可以學埋疏堂親戚關係圖㖭呀。
財經界係人都知，新世界發展(017)創辦人鄭裕彤出名鍾意照顧親戚，新世界系多間上市公司都由家族成員做董事，估唔到Sinomax董事長兼創辦人林志凡都鍾意咁樣，佢就冇偏心自己個仔林仕超，佢呢位公子31歲，2006年大學畢業，翌年加入公司，前年先做營銷總監至今，未入董事局。
關係複雜招股書都出錯
五位執行董事，除咗林志凡，另外三位都係親戚，包括陳楓、林斐雯同埋總裁張楝，淨係得首席財務官林錦祥係街外人。而佢哋嘅親戚關係又唔係咁簡單，舉例，陳楓就係林斐雯媽媽嘅堂弟，即係堂舅父。
可能呢個家族譜太大，招股書都出錯，其中一段寫張棟係林仕超堂兄，另一段就寫林仕超係張棟表弟，明顯係搞亂堂與表嘅關係。經查詢後，佢兩位其實係堂兄弟。
同樣今日招股、又係家族生意嘅中國虎都(2399)就簡單得多，董事局內三位執行董事，一個係阿爸、創辦人郭建新，一個係做總經理嘅阿仔郭漢鋒，擺到明係打算子承父業。
郭漢鋒都幾後生，只得24歲，5年前大學畢業就加入公司，好快就有「上市公司富二代」呢個名堂嘞！
李華華
mailto:LiWaWa@AppleDaily.com
【7.1上街】自己政府自己揀，直播7.1大遊行:
http://71.appledaily.com/
LiWaWa@AppleDaily.com
中環在線 - 李華華 舊文