石油變局
2014/6/30 9:56:55
網誌分類: 經濟
美股上周五無乜上落，可以講吓石油。
美國開始容許兩家石油公司出口輕質原油的消息，係劃時代的新聞。由於美國頁岩氣發展得好成功，國內的能源使用，逐步轉去頁岩氣，對石油的依賴日漸減少，預計明年，美國將成石油淨出口國(除仍向加拿大入口石油之外)，向世界各地供應石油。
現在牛刀小試，已經帶來石油行業好大震撼，位於德州，獲批出口輕質原油的生產商，股價當然勁爆，但煉油廠因美國出口原油會增加供應，估計布蘭特期油油價因而每桶拉低了6美元至9美元，而跌到七個一皮。
美國佬做事一向好有戰略考慮，特別在73年石油危機之後，他們知道能源重要，無能源經濟會好痛，因此老早就建立了龐大的石油儲備，與此同時，國內的油田又唔開採，以備不時之需，大部份的原油從外國進口，並壓住油價在20美元左右，平價大量利用他國能源。
眾所周知，美國以前大力度插手中東事務，主要係操控石油資源。現在，美國已經變成石油淨出口國，海外的石油資源對美國而言，已相對地沒有那麼重要。美國自此可以放輕中東事務，將注意力轉移去對付中國，國際局勢因而轉變。
此外，美國由石油淨入口國，變成為淨出口國，石油供求，出現一個好大的缺口，除非歐洲以及中國的石油需求大幅提升，填補到這個缺口，否則，長期而言，油價難免回落。當然，由於近期中東以至東歐地區，地緣政治仍然不穩，油價在短期內仍會高企。事實上，美國佬也樂見高價高企現狀，因為高油價維持長一期，對中國經濟壓力就多一點。
但睇三隻油股走勢，知道市場看法，最強的是集中做下遊賣油的中石化(386)
，上下遊平衡的中石油(857)都可以，最弱是集中採油的中海油(883)，似乎投資者都在賭油價見頂，睇住美國佬個局，若果你揸住呢三桶油其中一隻，就要好小心研判未來個石油世界係點。呢啲油公司早前有國家任務去外收購，萬一油價大變，佢地買落的項目就要重新估值。 陸羽仁
回應(0) 我想回應
陸羽仁 BLOG 舊文