情陷夜中環：單身蜜語
■女士不要隨便找個男人，望著鏡子說，I deserve the best and only the best。
男人沒有女人不會死，打波打機打邊爐，開心好簡單。相反，雖然香港女仔好勁，乜都叻乜都識，但一講到「單身」，她們會不知所措。
認識一位女性朋友，很厲害的。為方便引述，就叫她做Erica。自從步入青春期，Erica的男朋友就一個接一個，十幾年來，從未試過單身。即是說，十幾年來，就算Erica今天跟這個「BB」分手，明天也立刻有另一個「豬豬」補上。
男朋友一個接一個，Erica引以為傲。Erica的一班女性朋友，當然沒有在Erica面前說三道四，只蔽著良心說她是國色天香，男朋友應接不暇是必然定律。待Erica不在視線範圍，女性朋友的真心話才一句接一句。就算口賤如我，也覺得這些真心話去得太盡，若要在這裏收錄，實在半句也寫不出來。簡單嚟講，女性朋友都覺得Erica太濫。
胡亂放電如壞雞髀
Erica靚唔靚？我唔評論，但每次見到佢，我覺得好有安全感，如果八號風球突襲，站在她身後一定沒事，if you know what I mean。「嚇？咁嘅貨色都有咁多人追？」多人追同「質素高」絕對係兩件事。見到女仔有好多狂蜂浪蝶，好多人第一個錯覺就係──呢個女仔一定好高質素。黐線，你試嚇擺舊變壞咗嘅雞髀喺垃圾桶，都一定有大把烏蠅飛埋嚟。一個對住阿豬阿狗都放電嘅女人，就好似一舊壞雞髀咁，點都會吸引到啲烏蠅，but hey，只是烏蠅而已。
好像Erica這種從不缺男人的女人，她們的問題可以用三個字講曬，「要求低」。雖然沒有見過Erica任何一個前度，但如果有幸翻開她的portfolio看一看，十個前度，我敢肯定一隻優質股都唔會有。
女孩子要活出單身的矜貴和快樂，唔係教你吊高嚟賣，但千祈唔好見到個稍為ok少少嘅男仔就好似執到金咁。其他男人我唔知，但如果係「葉朗程type」嘅男人，其實身體內置咗一個好強嘅censor，「姣婆指數」過高嘅雌性動物，我哋見到一定即閃。
識唔識拍拖，你唔需要為任何一個女仔操心，因為每個女仔都會有拍拖天份。嬌嗲型又好，溫柔型又好，女仔與生俱來總有一兩度撒手鐧是可以降服男人的。拍拖拍得好耍家，但一講到「單身」，好多女仔都束手無策。「嚇？單身？咁邊個喺電話𠱁我瞓覺呀？」愛情理應至上，為何女仔要學會「單身」？
就是因為愛情至上，女生才要學懂單身。如果說拍拖是一個「愛另一個人」的過程，那麼單身就是一個「愛自己」的階段。愛自己，因為你要準備好自己，去愛另一個人。所謂愛自己，就是不用降低自己要求來隨便找個男人，望著鏡子說，I deserve the best and only the best。當那個他未來到之前，靠自己來做好自己、建立自己、活出自己，就是愛自己。
當你去到那個境界，即是徹底活出自己的時候，正如一位外國作家所說，all you have to do is breathe，and the best kind of men will naturally fall in love with you。星動月移，也只因為你呼吸的拍子，所謂女神，就是這個層次。趁著這個機會，跟你分享一則「女神婆婆」的金句。
淩晨時分，數碼港的天空，繁星滿佈。看完電影，我以酒精未散為理由，拒絕開車。「我第一次見人睇戲會飲紅酒。」Danielle在電影散場的時候說。飲酒可以定驚，我解釋。「又唔係睇恐怖片，定乜嘢驚？」第一次同你睇戲，好緊張，所以要定驚。Danielle沒好氣的說：「我整到你緊張？」本來ok緊張，見到你條裙咁短，再緊張啲。戲院裏面，你一坐底，條裙短上加短，變咗超級緊張。「睇戲原來為睇腳，what a變態佬。」
那是一年前的某個晚上，跟Danielle第三次約會。第一次約會，食飯；第二次約會，食甜品；第三次約會，食飯加睇戲。那時候，還只是一場同事，還只是第三次約會，Danielle竟然叫我變態佬，我覺得好有親切感。
介唔介意陪我散散步，順便散散酒？Danielle看一看錶說：「其實我唔介意自己搭的士。」我知你唔介意，我介意。就這樣，我們沿著行人路慢走。路上，談談公事，談談車路士，談談面前的貝沙灣，最後，終於談談情。
女仔拍拖要有quota
同呢個男朋友一齊咗幾耐？我試探著問。「你估嚇。」Danielle說。What？你估嚇？原來她真的有男朋友？我早該猜到，早就不該問。那一刻，心臟以高速往下沉，那股離心力讓我想吐，但我非常有氣度地擠出一個俊朗大方的笑容。一年半？Danielle沒有回答，好半天後才說：「I was kidding，冇拍拖。」夜空中的繁星突然閃得更光，為我慶祝。
嚇？真係冇拖拍？咁靚女都冇男朋友？「婆婆教我，女仔唔可以拍咁多次拖，拍拖太多，會唔矜貴。」Interesting，咁你婆婆有冇畀個quota你，准你拍幾多次拖？Danielle笑兩聲說：「有。」幾多個quota？「Too personal，唔答。」時至今日，婆婆畀咗幾多個quota唔重要，因為我已經是Danielle最後一個。
婆婆說得好，女人拍拖太多次，會唔矜貴，會貶值。Rap歌rap到街知巷聞的「農夫」，有首歌叫做《偉大航道》，由農夫的C君主唱，其中一段歌詞，與婆婆的金石良言互相輝映。
「唔好隨便同人發生關係，話就話前事不提，都係另一種虛偽，因為，我始終認為，你老公都唔想知道佢有咁多襟兄弟。」
葉朗程
葉朗程
情陷夜中環 - 葉朗程 舊文