中環在線：股神啟發預測冇用
張化橋打倒自己
■張化橋講明，畀多多錢佢都唔再做分析員。
分析員轉view見得多，完全推翻自己過去嘅工作真係少有。「民企之父」張化橋做分析員超過10年，2006年毅然轉行走去深圳控股(604)做管理層，佢前日喺一個講座上自爆，當年因讀完一本關於股神畢菲特投資理念嘅書，就唔想再做預測。佢𠵱家諗番起自己寫過嘅宏觀經濟分析，甚至覺得胡說八道，自嘲當時蠢到不得了。
新地(016)旗下新閱會前日舉行讀書講座，其中一位講者係張化橋。張化橋憶述，佢小時候喺湖北農村長大，資源貧乏，直到大學畢業都未認真睇書；1989年後出國澳洲，又只顧工作，只有時間閱讀財經書。
佢提到，《The Essays of Warren Buffett》一書對佢有當頭棒喝嘅作用，呢本書結集股神寫畀股東嘅信嘅重點，張化橋非常認同畢菲特提出嘅三個觀點：唔預測不能預測嘅事情、注重長線資產增值、只投資自己熟悉嘅行業。
■話唔定大家睇完畢菲特嘅《The Essays of Warren Buffett》，可能都會有更深嘅體會。 
■《The Essays of Warren Buffett》 多錢都唔再做分析員
而當時張化橋就係日日寫兩份報告，天天預測GDP、滙率。反思過後，佢即刻向瑞銀劈炮，唔再做分析員，仲話畀多多錢佢都唔再做。
至於讀書建議，張化橋認為「不浪費時間，就有時間」。佢話，𠵱家好多經濟學家出書講宏觀經濟，連佢自己都睇唔明，「沒有條件就不要看，讀者跟書本要講緣份」。張化橋將呢套理論引伸到投資上面，指中國嘅乳業、鐵路、建築同互聯網行業「看不懂」，所以絕對唔會花時間研究。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文