金融High Tea 2014年7月14日
佔中市 要部署
2014年07月14日
踏入7月，匯市股市氣氛奇怪，例如港匯持續強勢，股市理應要升，但恒指又好似唔係點想大升。上周五金管局持續於倫敦及紐約交易時段，按7.75港元的強方兌換保證價，沽港元接美元，再為市場注入105.4億元，是本月以來第11次接錢，金管局月內連番接錢，累計已放出394.4億元資金。
港元強，資金流入香港，即使唔係直接為買股，但資金充斥有利股市樓市。正路估計，資金流入可能與在第4季開通的滬港通有關，即係調定啲錢入嚟先，等滬港通開通就郁手買股。我估發生機會有七成，所以資金流入即使唔令港股立即升，都係中線利好港股。
資金流入 正路利好
不過世事無絕對，另外三成機會係剛好相反，買入港元只為將來沽出港元，買港元買到7.75，將來回番出去時，即使港元回到正常水平，都係7.77左右，只係唔見咗0.2%，接近無成本，但若將來大力沽出，而且唔係慢慢沽，仲係快手沽，咁製造出來的震撼效應較大，好易隊低股市。呢個諗法陰謀咗啲，但美國加息消息預計第四季可確認，香港佔中在8月底就上場，都唔好完全唔預計呢啲陰謀狀況。
周末同朋友聚會，佢哋問起點睇佔中對股市的影響，講起匯豐急改報告事件。匯豐上周一發表季度環球證券研究報告，由匯豐環球股市策略研究部主管魏宏兆操刀撰寫，報告指憂慮佔中將令到中港關係惡化，或會損害香港經濟，因此將港股評級由「中性」下調至「減持」。但出完報告後懷疑在網上大受批評，到傍晚突然改報告，將原來講睇淡的唯一原因佔中調落尾，將原來話「佔中，一場爭取更多民主的運動，會使中港關係變酸，損害經濟」的句語刪去，加入樓價下跌及自由行效應減弱等多項理由，懷疑在壓力下轉軚。
陸羽仁認為政治還政治，財經還財經，唔好因為政治理由，影響財經分析，畢竟財經關係自己荷包，唔客觀分析，盞自己蝕底，所以亦想將當日同朋友分析佔中對股市的可能影響講出來，畀大家參考。
八月月尾 決戰時刻
一般而言，政治事件唔影響股市，就算影響只屬短暫，所以我唔喜歡乜政治都講一通。反而我認為政治是反向投資的好機會，例如因為以色列空襲巴人地區令油價升、金價升、股市跌，反而應該作相反投資，博個市一兩日消化了消息就回頭。但佔中就複雜一點。
現時關鍵不是政府明天提交的政改諮詢報告，而係在8月底人大常委會的決定(估計人大開會是8月25日至28日，結束會議時公佈決議，人大會期未最後確定)。陸羽仁收到的風是人大常委會對政改的決議非常具體，雖然是以法律語言寫出，但其意思既會否決公民提名，亦會指出要由特首選舉的提名委員會，以多數方式選出特首候選人，意味着泛民候選人無乜機會入局。以現時的局勢，泛民見到人大常委會這種決議，馬上發動佔中的機會極大。
人數若少 無甚衝擊
所以，真正問題變成不是會不會佔中，而是佔中後有何結局及影響。按泛民一直對佔中的描述，他們會發動大量市民上街，佔領中環，逼中央政府在政改問題上讓步。關鍵問題有兩個，第一是泛民能否發動大量市民持續上街，說到大量起碼是5萬人，而且不止一天，是持續多天。第二是會否佔據主要馬路或包圍佔據重大設施，癱瘓中環商業中心或政府的運作。
若然發動出來的人數不多，或不能持續，如開始時有幾萬，但旋即跌到幾千，或者人多而不癱瘓中環，事件影響較細。好像美國的佔領華爾街運動那樣，有不少群眾長期聚集，但無實質影響。例如到時有幾千人長期聚在添馬政府總部外，但既不阻交通，亦不阻政府開工，政府很大機會不會清場，任由示威者長期在那裏。這樣一方面逼不到阿爺讓步，亦不會對股市有乜影響，可以「威照示，股照炒」。
人數若多 收唔到科
真正有殺傷力的，是佔中運動能不斷動員數以萬計群眾，癱瘓中環，政府就不易收拾局面。有人話示威阻街可以拉，甚至搵志願軍幫手拉，我覺得呢啲想法較天真。香港警察只有3萬多人，唔好話示威者有5萬，有1萬都拉唔得好多，因為無可能將3萬警察調晒去中環，即使唔畀差人放假調一半過去，都只係1萬幾人，示威人數隨時多過警察，無得就咁拉，只能驅散。全世界都係咁，警察出水炮車，出催淚彈，趕人走，頂多只是拉一部份帶頭搞事者。
雖然不時有風聲話搞到亂會出解放軍，但駐港部隊只有8000人，論人數幫唔到乜嘢，當然真係大亂時可以從內地調人落嚟，但若非逼不得已，阿爺不會行到呢一步。而且老外就係想影到一幅解放軍進駐中環的相，用嚟證明香港的一國兩制玩完，阿爺照計唔會咁老襯，若非到最危急關頭不會出解放軍。
若然泛民真係不斷動員到大量群眾上街，今日趕完，明日又來，持續地癱瘓中環以至政府的運作時，股市應該唔慌好啦。我同唔少了解阿爺想法的高人傾過，佢哋估計阿爺出解放軍之前，還有好多招數對付香港，可以停止所有內地旅客來港，可以停滬港通，可以停兩地的各種交流活動，借此震懾香港。可能有人話唔怕，少啲人嚟更好，生活得舒服啲。但做生意的人唔係咁睇，唔好講名店，在旺區開舖開茶餐廳的，由逼滿客變成拍烏蠅，都幾恐怖，唔使一個星期，香港就可以回到2003年沙士的狀況。到時做生意的、打工的就可能頂唔順，發出不滿示威的聲音，香港人就進入一個自己人打自己人的局面。
當然另一個可能是阿爺頂唔順，唔想香港死，被逼讓步，接受晒泛民的要求，讓香港有一個無篩選的普選，讓泛民無障礙地入閘參選特首。
有機出事 作好防備
你要我估佔中好成功時會點，我估阿爺企硬的機會有八成，讓步的機會只有兩成啩，所以局面好吊詭，若佔中唔成功，股照炒，股市無事。若佔中成功，阿爺被逼軟化放香港全面普選特首，亦無事。但如果佔中成功發動大量群眾持續上街，阿爺強硬回應，包括用停自由行、停滬港通那些極端手段回應(唔好提出解放軍了)，股市就會出大事，是典型黑天鵝事件。
咁爆鑊機會有多大，首先估計佔中成功發動大量人群持續上街的機會是五五波，即50%，阿爺強硬回應的機會是80%，即係有40%機會出事，唔係咁無可能。(你唔同意上述每件事出現的機率，可以調整機率計計，例如你覺得佔中能發動大量群眾的機率較低，爆鑊的機會就下降)隨着事態發展，機率亦會變化，好似跑馬近開場時賠率大變一樣。
請不要把上述分析看作抬舉佔中，或反對佔中，或者叫人佔中或不要佔中，這不是政治分析，而是投資部署。結論係可能有三、四成機會爆鑊，不宜太重倉(當然也不應太衝動馬上清倉，大幅抽高時另計)，等8月底9月初佔中派亮牌後，睇得清楚啲先至算。
陸羽仁
金融High Tea 舊文