中環在線：
曹仁超連番抗癌盼病友積極面對
■曹Sir舊年胃癌康復後出席公開場合。資料圖片
抗癌非易事，何況接連患上兩個癌症？人稱曹Sir嘅曹仁超舊年中戰勝胃癌，今年初竟然又驗出患上淋巴癌，為免嚇親友好，呢半年佢要求傳媒將事件保密，近日終於報喜，話治療進度理想，覺得係時候公開，仲話「如果有乜事，我想低調處理；但𠵱家冇事，我又想高調處理」，皆因佢想鼓勵同路人一齊積極抗癌。
胃癌康復再患淋巴癌
今年1月，曹Sir已經驗出喺肚腩仔有腫瘤，但諗住同時生兩個癌症嘅機會好微，所以農曆新年跟家人去完旅行再入院，仲差啲延誤治療。
曹Sir話，當時拖咗一個月，腫瘤已經成個足球咁大，雖然經過幾次標靶化療後，已經縮至半個拳頭咁大，但頭髮就幾乎甩曬，體重亦急跌至140磅。佢講笑話，喺街上見到，都唔會有人認到佢。
不過粉絲唔使太擔心，曹Sir近排已經重番十幾磅，顯示癌細胞有受控跡象，即將做埋最後一次化療，佢估計7月之後，好大機會完全康復。佢現時公佈病情，係希望可以用自己嘅經驗，話畀其他人知「有信心，任何嘢都可以面對」。
將接受最後一次化療
華華近幾個月跟曹Sir聯絡，發現佢雖然對個病有啲擔心，但態度好積極，只係病情有啲反覆。佢3月底仲精神奕奕大講股市，5月中又變得氣若遊絲，講兩句就要收線。噚日就精神番曬，傾近半粒鐘都得。
曹Sir好坦白咁講，康復順利，標靶治療有好大功勞，但療程費用就好貴，每次3萬元，所有治療費埋單要60萬元。
佢呼籲政府可以再努力啲，各界亦可以關注下，希望即使係負擔唔起標靶治療嘅病人，都可以享用到呢個醫療技術，「每個人都平等享有醫療待遇，我覺得呢個先係公義社會」。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文