異動空間：安踏明年會更好
今年股票難炒，關鍵在於走勢飄忽不定，指數如是、股票更甚。恒指日前大棍破位，係威係勢，之後三日就靜過鬼；失驚無神隊一棍，穿曬支持位，一追沽轉頭就被挾到投降，反之亦然。個股情況也一樣，要應付呢種爛市，一係高頻交易，摩打手一買完就排隊沽，但鋪鋪雞糊，費時又傷神。另一種係以慢打快，買完擺埋一邊等一、兩個月。
好似5月尾推介的大明國際(1090)，玩足一個月先破頂，仲又急又大棍，完全冇得追，唔坐呢一個月絕對無法修成正果。買完要等，仲唔知等到幾時，相當考驗持貨者的耐性，買之前一定要做功課，要了解才有信心。齋跟魏力推介買，但連隻股做乜都唔知，坐兩日艇就問點算，再過兩日慌失失沽埋，之後爆升的話，實在怪不了誰。
體育用品股中，安踏(2020)走勢最標青，揀股揀龍頭，識揀一定揀佢。美林最新報告預期，上半年安踏營業額增長20%，盈利升22%。2015年春季訂貨會料錄得高單位數增長，夏季訂貨會增長更會加速，同店銷售步伐亦會加快，簡單講就係「明年會更好」！彭博綜合預測，安踏PE約17倍，股息率4厘，對比增長絕對吸引，中線可上望15元。
魏力
http://www.facebook.com/2012jason
魏力
異動空間 - 魏力 舊文