【拆解情陷夜中環】勾引
好朋友兼主場博客史丹利很壞，竟然自編自導自演情色故事，再肆無忌憚的把它搬到《主場》這片淨土上。情色故事本身沒有甚麼的，但最讓人看不過眼的就是史丹利為女主角起的名字：Daisy。需知道，Daisy這個名字，代表著美麗與智慧，象徵著雍容和儒雅，也衝擊著男人的自信和尊嚴。
以前「青姐」胡孟青好像暗示過，葉朗程不應該在財經版出現，寫風月版會更貼切。我同意，所以打算入紙向《蘋果日報》申請調版。但還未成事之前，請青姐再多忍耐一會兒，因為我要再風月多一次。是次，想由一杯Americano開始，娓娓道出一個葉朗程和Daisy之間的故事。這位Daisy姓王，名迪詩。
公司老早發出電郵提醒各位同事，尤其是前線同事，「七一遊行」有機會造成「possible disruption in Central on and into the days following the July1st rally」。就這樣，我在7月2日當天特意早一個小時出門，結果回到公司的時候一個人也沒有。我再落樓下的LGB買杯咖啡，想不到晨咁早都要排隊，站在我前面是個老外，再前面是位擁有「九頭身」完美比例的女士。
有豐富贒女經驗的男士都知道，後面望落好掂嗰啲，前面通常非常「趕客」，我沒有對「九頭身」抱著任何期望。但九頭身好像有點麻煩，在手袋裏左找右找好一會兒也還沒付錢。極度沒風度的老外擺出一副不耐煩的嘴臉，我見九頭身開始焦急，於是走上前跟收銀員小姐說：「我請呢位小姐，畀多杯Americano我唔該，medium。」
買咖啡巧遇王迪詩
九頭身抬頭一望，我頓時呆著，面前這個女人，雖然面上掛有兩分憔悴，但那雙銷魂的眼睛充滿靈氣，兩片嘴唇粉嫩潤澤，越看她就越面熟，越面熟就越說不出她是誰。好半天，轉數快得像我這樣的，也想不到一句合適的開場白，反而是她先開口。
「唔該曬你，唔好意思，我啱啱先搵到個銀包。」她說話的時候，臉頰泛起一片深紅，好可愛。聲線溫柔，語氣卻洋溢著自信，整個sound bite跟她的俏臉很配。此時，她從銀包拿出一張紅色鈔票，遞到我的面前。話咗我請嘛，我說。最失禮，就是我的聲音竟然有點抖震。就連IFC張智霖都會口窒窒，換著其他男人，早已魂飛魄散。「多謝你，不過真係唔使客氣。」九頭身堅持。
望著這個小小的臉蛋，就在她嘴角微微揚起的電光石火間，我終於記起她是誰。耗盡全身的勇氣，我踏前一步，輕輕在她耳邊說：「王迪詩小姐，呢杯咖啡，係我小小心意，係葉朗程嘅小小心意。」王小姐的表情是預期中的錯愕，她出神的看著我，不，是打量我，由上而下再下而上的打量。文壇女神的臉上，突然綻起一個輕佻的微笑。「你係佢？」她問。我嘗試裝出一個最酷的眼神，然後輕輕點頭。
手中仍然拿著那張紅色鈔票的她，再打量我，然後問：「你點證明？」係喎，點證明？原來要證明自己是自己，不是簡單的事。我都唔知點證明，不過真係冇呃你。她原本那個輕佻的笑容，變得更加輕佻。「咁請問你邊一忽似張智霖？」真係唔講你唔知，就係個「忽」最似。
王迪詩用幾秒鐘想一想我的答案，然後含蓄一笑。「我有少少信你係佢。」點解？「你講嘢似佢。」幽默？「No，冇深度兼無厘頭。」第一次見面就咁讚我，可以點報答你？
王迪詩拿起櫃台上的咖啡說：「恭敬不如從命，呢杯咖啡就當你報答咗我。」從王小姐的眼神和語氣，我強烈感覺到她非常享受跟我交手。Ridiculous，一杯咖啡顯唔出我嘅誠意，我說。「葉生，你想點表示你嘅誠意？」晚飯，今晚。王迪詩想一想說：「咁易俾你約到？你覺得會唔會？Sorry，我嘅答案係thanks but no thanks。」普通男人，一早俾佢嚇到掉頭走，我唔係普通男人。我沒有立刻反應過來，只拿出BlackBerry內的日程表給她看。「咁即係點？」Daisy問。咁即係我今晚約咗人，但以表誠意，我可以為你推咗佢。
「𠱁女仔係有番兩度喎。」Daisy呷一口咖啡說。Bingo，bingo，bingo！就是這個眼神，根本不需要再說下去，她這個眼神已經是一個肯定的yes，但我必須尊重她的矜持。咁你係唔係會收番頭先嗰句thanks but no thanks？「你講一樣我今晚會想食嘅嘢，我可以考慮。」王迪詩呀王迪詩，枉咁多人覺得你機靈敏捷，估唔到盤棋咁快捉完，我將曬你軍啦小妹妹。No，應該係姐姐，佢大我一年。
成功將軍飯局再會
素聞王小姐鍾情君悅酒店嘅海南雞飯，所以我想帶你食海南雞飯，不過唔係Grand Hyatt，肯定仲好食過Grand Hyatt。王小姐微微笑道：「我真係淨係鍾意Grand Hyatt喎，想我移情別戀？」嘩嘩嘩，你話啦，呢句仲唔係flirt緊我？佢呢句對白，有九千幾個女仔同我講過，如何回應，葉朗程駕輕就熟。「你會唔會移情別戀，我控制唔到。不過想你知道，呢個世界天外有天。So would you like to try？」
王迪詩看一看我說：「似乎盛情難卻喎。」果然係揸筆搵食，講句嘢都咁鬼死文謅謅。似乎盛情難卻？即係好想去啦，都話將曬你軍啦，你冇棋㗎啦。既然盛情難卻，今晚七點半，你想喺邊度等？「蘭開夏道。」你真係住蘭開夏道？「有問題？」冇，不過我哋食飯嘅地方喺香港呢邊，咁我即係要由IFC揸車過九龍，然後再返嚟香港呢邊？「嫌麻煩呀？咁唔好食啦。」唔麻煩，唔麻煩，想搞清楚啲logistics啫。「咁你搞清楚未？」清楚曬，我說。如果給我一條尾，我覺得自己同隻狗冇乜分別。「Good，今晚見。」她拋下一個微笑，轉身就走。Wait a minute，蘭開夏道咁長，你住幾多號？「蘭開夏道一啲都唔長，你架車夠搶眼嘅話，一定會見到你。」
我忍，睇你威得幾耐。學史丹利話齋，我今晚就要將你就地正法。
(待續)
葉朗程
葉朗程
一周三件 - 錢雋 舊文