中環在線：
捷星未獲發牌起飛無期
賭後賣飛機慳錢
■何超瓊有份投資嘅廉航捷星香港，因為政府遲遲未發牌，正考慮賣飛機削開支。
有傳香港航空年底上市，證明航空業仍然有價有市。不過消息指，「賭後」何超瓊有份投資、由信德(242)、東航(670)同澳洲航空合組嘅廉航捷星香港，因為政府遲遲未發牌，正考慮賣飛機削開支，真係同人唔同命。
9架飛機已賣3架
澳洲《布里斯本時報》指，由於捷星香港未獲港府發出空運牌照，啟航無期下，考慮將手頭上三架A320飛機賣走，節省停泊、維修開支。捷星香港行政總裁劉仲威同華華講，董事局正就優化機隊嘅機遇作評估，但公司已經準備就緒，一旦獲發牌，可迅速投入服務嘅計劃冇變。
早於2012年時，東航同澳洲航空已組成合營公司，成立當時唯一一間以香港為基地嘅廉航捷星香港；舊年仲跟手搵埋「賭後」何超瓊旗下嘅信德入股，投資超過5.15億元。當時公司估計，最快2013年開始營運，2018年時機隊規模增加到18架。
不過，消息指政府一直hold起捷星發牌嘅處理，而國泰航空(293)、香港航空亦表明反對發牌，再加上機場升降時段、泊位緊張，令原本已經立立亂嘅政府寧願少做少錯，所以捷星仲未「飛得起」。
據聞，萬事俱備，只欠廉航牌照嘅捷星，舊年底已經引入9架A320飛機，全部停泊喺法國圖盧茲；點知政府拖嚇又一年，拖嚇又一年，公司今年4月左右終於割愛，賣走其中3架飛機，如今可能要再賣走3架，認真慘情。
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文