金融High Tea 2014年7月8日
炒加價
2014年07月08日
呢兩日最多人講係政治，股市同其他政策都無咁多人有興趣。房委會宣佈加租一成，同時不作寬免，平時肯定搞到議員政黨跳晒出嚟抗議，話唔定連收租股都借啲意炒吓。
現在就只講吓，其實以近年公屋嚟講，加幅算係高，呢樣嘢反映香港生活成本上漲，以及實施最低工資，推高咗基層打工仔收入。
生活成本連同營運成本增加，對於企業都有影響。港鐵(066) 周三公佈今年加薪幅度，市場傳出公司加薪將達4.2%至4.5%。
九鐵車務員協會明言，若連同其他福利調整，加薪幅度不達7%，工會將考慮發動會員按章工作，鐵路員工會回應稱，要看整體情況再作部署。
港鐵近日頭頭碰着黑，管理層弱勢，加上今年公務員加薪咁手鬆，雖然港鐵唔係政府機構，但佢有七成半股權，員工見到公務員加人工加得多，自然有期望，所以家係考驗管理層管治意志嘅時間嘞。
另一樣會加嘅係電訊服務，香港電訊(6823) 合併PCCW-HKT流動通訊及one2free合併成新品牌CSL。市場早前估計最多加價40%，公司高層昨日對加幅估計只係回應，新品牌月費高過以往PCCW-HKT的月費，是以one2free的價位作為藍本。
其實流動網絡加費跡象近日開始出現，好多網絡商開始限制用戶數據使用量，如果唔想減少用量，咁就可能要畀多啲錢。有外資大行因此稍為看好本地電訊股，瑞銀早前就畀「買入」評級畀和電香港(215) 同數碼通(315) ，可見間接加價係行業趨勢，幾隻股份近排表現都算靚仔。
港交所創一年新高
講番港股，昨日港股繼續牛熊角力，恒生指數早段最多升46點，惟23600點阻力大，加上內地股市走弱，港股掉頭下跌，一度挫111點，午後沽盤收斂，最終恒指收報23540點，跌5點；國企指數收報10487點，跌2點，成交縮減至483億元。
幾隻首掛新股好似媒體應用解決方案供應商世紀睿科(1450) 、內房商國瑞置業(2329) 升幅都濕濕碎。反而做多咗生意嘅港交所(388) 獲高盛升目標價至167元，股價再升穿150元關，一度高見154.2元，創52周新高。
港交所咁靚仔，點都係同滬港通概念有關，所以昨日繼續炒AH大折讓股，東北電氣(042) 急升逾一成，收報1.5元；浙江世寶(1057) 升9%；山東墨龍(568) 飆8.5%；京城機電(187) 漲6%，造3.79元。
睇番浙江世寶係好冷門嘅國企，過去三年股價從未升過4元，但自從滬港通消息後，由於內地股價高達25元人民幣，佢借住滬港通概念，股價不足三元爆升咗近倍。
浙江世寶主要經營汽車轉向產品的研究及開發，主要從事汽車轉向器及其他轉向系統關鍵零部件的研發、設計、製造及銷售，過去三年盈利由1.12億跌到去4882萬，目前市盈率去到39倍，家買落去好明顯就係只炒一樣嘢。
炒折讓要夠膽做清兵
至於山東墨龍，內地A股股價係10元人民幣樓上，比H股4.08元高一倍半；而山東新華(719) H股收3.72元，內地A股係7元人民幣以上，高出差不多一倍，所以話咁樣炒中港差價概念，只能講係做清兵心口有個勇字，憑嘅係信者得救四個字。
陸羽仁
金融High Tea 舊文