陸羽仁 BLOG 2014年7月18日
烏國之災
2014/7/18 9:21:20
網誌分類: 經濟
一單馬航飛機被擊落，轟掉杜指161點!
烏克蘭局勢再度緊張，馬航客機在烏克蘭被擊落，市場擔心美國及歐洲進一步制裁俄羅斯。投資者嚇到腳軟，股票恐懼指標VIX指數暴升32%至14.54至今年1月以來最高！航空股大跌，其中Delta Air及United Continental齊跌3.5%，彭博社美國航空股指數重挫2.3%。
美股結束三日升勢，在高位借勢回吐，其實早段聽到馬航墮機美股跌唔多，杜指早段只係跌50、60點，到11點後開始傳架機俾防空導彈擊落，投資者開始覺得事態嚴重，唔係一般空難，杜指就反覆下插，1點後一直向下無反彈，結果杜指跌161點至16977點；標普500指數跌23點，收報1958點；納指繼續跑輸大市，大跌63點至4363點，跌幅超過1.4%。
除了馬航事件外，以色列衝突升溫亦有影響，以軍開始開入加沙地帶，展開地面戰鬥，亦令投資者心寒。避險情緒急升，所有避險資產皆漲，資金流入債市，美國10年債價急升，債息跌穿2.5厘，跌至2.458厘低位。黃金價格一度急漲1.5%至每安士1319.9美元，今日早段報1318美元。日圓匯價向上，美元兌日圓跌至101.1圓，歐元兌日圓跌至5個月低位。俄羅斯盧布兌美元急跌2%。
一部馬航客機昨日在烏克蘭接近俄羅斯的邊境墜毀，懷疑係遭到地對空飛彈擊中。機上295名人員，無端丟掉生命。馬來西亞航空真係禍不單行，四個月內發生兩次空難！早前MH370失蹤，依家又一架客機被擊落，除咗嘆句世事無常之外，馬航發生咁多事，管理水平令人極度懷疑。
至於誰是兇手，雖然烏克蘭軍方同俄國支持的叛軍互相指責，但從烏克蘭政府截獲俄軍和烏克蘭叛軍電話通話可知，好大機會係叛軍誤以為馬航客機是烏國政府運輸機，將之擊落(http://goo.gl/Z8lFex)。美國先下手為強，宣佈制裁俄羅斯兩家銀行Gazprombank及VEB、兩家能源公司Rosneft及Novatek，以及多家軍火合約商。
美俄打大交，歐美股市首當其衝，一般而言，地緣政治風波影響股市，唔會維持得耐，風波稍息，股市即彈，唯一要留心的是美股在咁高位，會唔會借勢調整得深少少。
陸羽仁
回應(5) 我想回應
陸羽仁 BLOG 舊文