金融High Tea 2014年7月18日
數據背後
2014年07月18日
內地公佈第二季增長數據，若然唔苛求的話，同管理層訂立嘅指標好近，應該已經算係靚仔，不過，市場反應唔係咁，消息公佈後，內地股市仲係軟軟吓，昨日港股早段都係無乜力，中資股都唔係特別醒神，同利好消息似乎唔係咁夾。
昨日情況仲明顯，內地兩市低開後跌勢一度加劇，上證指數跌穿2050關，尾市沽盤收斂，大市跌勢先略為喘定。上證指數收報2055點，跌11點；深成指一度急挫逾1%，收報7194點，跌67點或0.92%。創業板指數三連跌。強勢的國企改革概念股回吐，拖低深滬股市。搞到美股創新高，港股都無料到，恒指要微跌收場。
增長消息好 股市唔跟升
同一位政商猛人傾起，佢啱啱喺內地返嚟，佢就講出另一幅圖畫。猛人話，佢同內地官員接觸，大家都呻到樹葉落，話經濟好唔掂，原因有好多，其中包括家反貪腐，官場人心惶惶，而且無咗送禮畀官員同公費吃喝嘅需求，所以都唔知點解公佈出來的內需仲有唔錯嘅表現。
官員話，好多省份今年上半年增長，只有去年五成左右，個別地區聽講仲無增長，大家都頭痕緊點樣可以扳番增長條數，就算唔達標都唔好相差得太遠，但家好似巴西對德國咁，上半場已俾人入咗五粒，咁你話點追呢？所以唔知點解公佈出嚟的全國增長數字，可以咁高，或者係大家計法唔同啦！
房地產汽車銷售未見明顯起色，發電量等指標仍然偏弱，零售銷售亦低於預期；而且上月M2增速達14.7%，超出人行制定的目標，好明顯係谷水支持經濟，但同時令下半年有通脹升溫的隱憂，瑞銀證券研究部副主管陳李就預計，今年底通脹率升至2.8至2.9%，物價上升，將難以大規模放鬆流動性。
雖然美股上日造好，令恒生指數高開60點，但由於內地股市反覆向下，港股掉頭向下，幸好拋售壓力唔大，恒生指數收報23520點，跌2點，成交縮減至520.6億元。
不過，內地股始終不乏炒作消息，中石油集團考慮將中石油昆侖燃氣公司注入上市子公司昆侖能源(135) ，昆侖股價急飆0.9元，收報13.12元，是表現最佳藍籌股。
近排股價反覆向上嘅中國外運(598) 按每股4.8元，配售3.57億股新H股，比上日收市價5.43元折讓12%。配售所得約17億元，擬作一般營運資金，支持集團發展。配售後摩根士丹利發表報告跟進，認為對股東影響輕微，維持「增持」評級，目標價5.22元，睇嚟今次都有大行力撐。不過既然公司配股，都係覺得股票夠高啦。
陸羽仁書展簽名會現真身
P.S.最後提提大家，陸羽仁喺書展會推出新作《對賭》，今個周六同周日，會在三點到五點現身為書迷簽名，如果大家想捧場的話，記住依時去1A-38攤位啦。
陸羽仁
金融High Tea 舊文