陸羽仁 BLOG 2014年7月28日
高盛唱淡
2014/7/28 上午 09:16:18
網誌分類: 經濟
美企業績唔掂，高盛又話個市短期唔得，拖累美股向下，杜指上週五跌123點，失守萬七點，收報16961點，標普500指數跌10點至1978點，納指跌21點，收報4450點。總結全個星期，杜指表現比較差，累跌0.8%，係6月中以來最大跌嘅一周跌幅；標普500指數打和，納指則仍有0.4%進賬。
亞馬遜同Visa都係反映零售市場的重量級企業，上週五齊齊公佈業績，都係麻麻地，打擊大市氣氛。亞馬遜股價重挫近11%，係表現最差嘅標普500指數成份股。亞馬遜第二季度淨營收為193.40億美元，比去年同期的157.04億美元增長23%；淨虧蝕為1.26億美元，比去年同期的淨虧蝕700萬美元擴大，每股虧蝕27美仙，遠比市場預期的15美仙高。亞馬遜生意做大咁多，但虧得亦多，盈利前景真係好一般。
更具殺傷力嘅係Visa，佢更下調全年營收預估。令到投資者覺得下半年企業盈利前景可能不如此前想像得那麼樂觀，Visa股價跌3.6%，領跌杜指。非必需消費品股受到拖累，收低1.2%。其中星巴克美洲地區季度同店銷售增長6%，雖然好過預期，但股價仍要跌2.1%。
商務部上週五報告，美國六月耐用品訂單增長0.7%，遠好過市場預期的增長0.2%。但市場氣氛唔就，對大市無甚幫助。
美國零售業巨頭業績唔靚仔，影響市場情緒之餘，外圍氣氛唔得，亦係拖住美股後腿的力量。首先係德國Ifo企業景氣指數不及預期，德國股市大跌1.5%，法國CAC 40指數收跌1.8%。其次就係俄烏緊張局勢仍在持續，烏克蘭總理亞采紐克(Arseniy Yatsenyuk) 已在週四宣佈辭職。據聞歐盟已就對俄羅斯實施更嚴厲制裁的問題達成逐步協議。
不過我更留意高盛份報告，佢在上周五發報告，影響咗美股最後一個鐘彈都無力彈。高盛雖然話企業派息收益率仍遠高於國債收益率，在未來12個月，股市肯定是最有吸引力的資產類別。不過，全球經濟成長加速的利好因素「大致已經消化，而地緣政治風險升級。加上未來三個月市場利率會上升，或將拖累股市下滑，「預計相比過去幾年，股市回報的基本步幅將放緩。」佢將短期睇法調低到「中性」。按地區劃分，高盛增持歐洲和日本股市，減持美國股市。按行業來看，高盛看好成長型產業，增持美國、歐洲、日本和亞洲的科技股。
簡單講高盛話美股升得多要回吐。第一睇你信唔信佢。第二若然佢啱幾時發生。我傾向相信美股直線升得太多要調整，但認為何時回落好難講，未必係高盛一講即落，遲一兩個星期都得，不過炒股者要睇路，唔好咁長線話睇幾多幾多點啦，睇住條路，有路就行，唔路就回頭，反正都係搭順風車，要識落車至好。
陸羽仁
回應(0) 我想回應
陸羽仁 BLOG 舊文