金融High Tea 2014年8月27日
留力食胡
2014年08月27日
美國出口術為加息鋪路，扭扭擰擰，一時話加，一時又話未加得，好似房屋數據差，聯儲局主席耶倫就扮吓鴿派話未有咁快加息，佢咁講撞啱歐洲央行行長德拉吉暗示央行好快會放水，歐股即時彈高，帶動美股高收。
月尾結算有攻防
雖然外圍股市受寬鬆貨幣言論刺激，但香港開市就傳來中國正回購消息，恒指無跟住外圍造好，反而全日軟吓軟吓。今個月大市升咗唔少，仲有幾日就結算，估計大戶會留吓力，有機會食啲胡，等到月尾希望保住喺25000點樓上結算。
人行公開市場昨日推行100億元人民幣14天期正回購操作，內地股市反覆下挫。A股走低，港股午後亦愈走愈低，最終跌近百點，挨近全日低位25068點收市。恒指全日收報25074點，跌92點；國企指數收報11124點，升8點，成交645億元。
藍籌股普遍向下，8月份當炒嘅港交所(388) 跌咗3.5元，終於穿咗180元關口。不過三桶油繼續炒作，中石油(857) 升2.4%，收報11.24元，是升幅最大藍籌。中信泰富(267) 將易名為中國中信，昨收報14.86元，挫3%。
近排內房宣佈業績，同過去旺市人人都有靚靚成績表不同，今次公佈的內房股榮辱互見。好似恒大地產(3333) 截至6月底止半年業績，純利70.9億元人民幣，按年增加13.6%，不派中期息，期內營業額按年增加51%，算係唔錯。公司高層表示，現時公司的土地儲備達1.5億平方米，足夠未來5至7年的發展，故此在下半年會保持審慎，不會再大規模買地，股價昨收報3.38元，升咗4%。
內房業績有幸有不幸
另一隻雅居樂(3383) 同期股東應佔盈利20.43億元人民幣，按年微跌咗4.3%，派息14.5仙，期內收入就增長13.6%。純利跌得比較多嘅係富力地產(2777) ，中期股東應佔盈利10.68億元人民幣，按年減少26%，不派息，同時降低全年銷售目標至600億元人民幣，股價昨日急瀉，收報10.04元，跌7%。仲有一隻合生創展(754) ，中期盈利8.41億元，按年減少60.4%，股價亦跌咗2.5%。
以前樓市一片向好時，內房發展商勝負關鍵係邊個夠勇，邊個有辦法攞到地，總之做得多、做得快就係贏家。但兩年前中央開始加強調控，大城市有限購令，土地成本又急漲，內房商應變各師各法，有人走去二三線城市發展、有人專攻豪宅、有人加強搞商業樓宇或收租物業。到咗今年內樓市逐步放緩，唔同應變方法嘅效果都好唔同。
內房股表現短期料受業績影響，普遍都有壓力，如果睇長一啲，就要睇「金九銀十」的銷售成績，由於個別城市已經放寬限購，又傳話中央會以房產稅代替調控，股價表現取決於內房商能否營造番好啲氣氛，喺賣樓旺季做番齣好戲。內房股近排表現有啲落後，如果想兜平貨博吓反彈，就要睇住佢哋賣樓嘅策略嚟落注。
陸羽仁
金融High Tea 舊文