金融High Tea 2014年8月8日
內地樓市仲未掂
2014年08月08日
港股7月彈上三年高位，好多板塊都炒吓反彈，不過股巿有股市炒，現實世界可能係另一回事，內房股近日升咗唔少，但內地樓市的負面消息仲不斷咁出籠。
港商起靚嘢好易領嘢
早排內房股炒升，多少同內地多個城市傳鬆綁限購政策有關，但搞咗一輪，有做地產嘅內地朋友仲係呻到樹葉落，話市況仲係好差，未見好轉之勢。
照《21世紀經濟報》報道，在浙江、江蘇、福建等地，都出現業主因個人按揭貸款逾期，無力還款而「棄房斷供」的情況，遭銀行起訴。
目前無數據顯示，「棄房斷供」成為全國普遍現象。但報道引述南京的業內人士指，目前南京雖沒有出現類似情況，不過貸款逾期率和逾期額在上升，下半年出現「棄房斷供」的壓力很大。
買家斷供，新樓自然難賣，搞到連投資大戶都打退堂鼓。早幾年內地地產熱炒，不少基金大手投入，家開始有投資者提早離場。
《華爾街日報》報道，瑞安房地產(272) 合作方房地產基金Trophy Property Development(TPD)，遭31名投資者以折讓價格出售持有的12%股份，而且都好大機會要蝕賣。瑞房就對於投資者的決定不予置評。
呢單消息令人關注瑞房的營運模式。自從借上海新天地打響頭炮，近年瑞房不少項目都用「舊城改造」攞地，咁玩即係慢工出細貨，動輒令項目延遲，同時拆遷費用增加，令這類項目需投入更多資金。
瑞房亦似乎意識到公司存在着資金缺口，透過重組項目資金結構嚟改善情況，但撞正市道唔係咁靚仔，就更加頭痛。
內地朋友話，家至係考驗房地產業者經營手法嘅時候，香港有幾個發展商，喺好景時都係落重本整靚嘢，有啲仲走去二線城市大大棍摳落去，咁家隨時就起靚嘢變領嘢嘞，所以現在買內房股，要抱住順市短炒的心態，兼且要避開有可能起咗大白象的發展商。
人行再吸水，昨日進行200億元人民幣正回購，內地股市午後跌勢加劇，連帶港股亦延續調整格局。恒生指數全日收報24387點，跌196點，成交金額775億元。
冶煉金屬谷底回升
德銀發報告表示，預料勞動力成本有上升壓力，觸發濠賭股被拋售，成為昨日跌市重災區。銀河娛樂(027) 大瀉6.38%造59.4元；金沙(1928) 急跌5.76%報52.35元；銀娛及金沙更是表現最差兩隻藍籌。至於澳博(880) 挫3.37%造19.76元；美高梅中國(2282) 插6.34%報25.85元；永利澳門(1128) 瀉7.56%造29.35元；新濠(200) 降4.81%造21.75元。
跌市當中，仍有股份嚟料，包括冶煉工業用金屬的礦業股中信大錳(1091) 、新疆新鑫礦業(3833) 。呢類股份係受產品價格谷底回升同工業產值改善帶動，同類股份在內地已經炒咗一排。
中信大錳股價同淨值存有折讓，公司首季經營有虧損。新鑫情況有啲似，唔同嘅係佢早前公佈盈喜，話季度業績有改善。
陸羽仁
金融High Tea 舊文