金融High Tea 2014年9月18日
出口術有風險
2014年09月18日
美國議息結果揭曉前夕，恒指喺八連跌後終於彈咗一彈。有聯儲局「深喉」之稱的華爾街日報記者希爾森拉斯傳出消息，話聯儲局在停止買債初期，仍會維持對息口保持喺低水平的說法，美股上日升咗過百點，港股亦有小小偷步反彈的味道。由於始終唔知佢開大抑或開細，故此指數彈咗三百點後，買盤就無力跟進，相信係想等埋短期息口明朗化先。
耶倫有條件慢慢搞
聯儲局收水行動有秩序進行，買債計劃即將結束，跟住市場就問，咁幾時會加息呢？照正路計，美國家經濟比起其他國家好似日本同歐洲都靚仔好多，就算佢唔郁都可以吸引到資金流入，無必要咁快加息搞到全球經濟震騰騰。
耶倫做咗聯儲局主席，家係佢任內終止買債放水計劃，跟住仲有好多時間可以慢慢搞。正常啲講，最好係維持低息多一陣，等復甦勢頭再旺啲先考慮，因為家美國雖然係好景，但歐洲日本都唔掂，中國亦都係減緊速，美國呢個時間收油，一有閃失就會整出個大頭佛啦！
有中環茶友就從政治角度分析，佢留意到最近前國務卿希拉莉開始為參選總統熱身，相信踏入明年，選舉因素對市場的影響會開始加強。
佢認為，美國喺2016年就會進行大選，如果聯儲局主席想幫執政民主黨連任，反而最好係快快加息，到選前就放鬆番，等股市上升，產生財富效應，增加選民對政府的滿意度。按照呢個想法，最好係明年上半年就嚟料，快快手手加番兩厘息，不過就算係咁，又使唔使咁快呢個月就出口術呢？
有消息話人民銀行昨日對五大行實施5000億元人民幣SLF操作，五大行全線升，成為反彈火車頭。建行(939) 表現最標青，彈咗差不多2%，造5.81元。幾隻A股ETF前日急跌後都因為在人行出手消息下回穩。安碩A50中國(2823) 報9.24元，回升1%；南方A50(2822) 漲0.7%，造9.48元。
本來個市升幅都一度擴大至334點，但50天線阻力都幾大，撞上內地股市短暫倒跌，港股升幅收窄，恒生指數收報24376點，升240點；國企指數收報10893點，升175點，成交金額770億元。如果美國議息對利率講法比較溫和，個市彈多浸都唔出奇。
工信部公佈，現正修訂的電動汽車標準還有77項，現時已完成報批的標準共23項，將於近期批准公佈。在仍然修訂的標準中，有61項涉及基礎設施規劃設計、建設運營、電池回收利用等標準。
電動車標準現雛形
工信部認為，中國目前電動汽車標準體系已初步建立，對規範電動汽車產業發展具重要意義。消息公佈對於相關板塊刺激唔係咁明顯。不過，電動車同太陽能係內地持續推動的產業，呢兩類股份遇着個市調整不妨加以留意，始終政策有利，佢地在升市期間有機會跑贏大市，跌市就會無跌得咁傷，咁樣一來一回，贏面已經好唔同。不過近排美國電動車股王特拉斯被大摩唱淡，股價大幅回吐，搞到電動車股有啲壓力。
近日好多股仔玩單日爆升。由於公佈在內地業務獲洽購，冷門股賽德利(1768) 一度爆升50%，之後升幅收窄，收報2.01元，仍升33%。該公司主要從事生產纖維素，包括在巴西種植木材及生產和銷售纖維素產品，以及在中國生產黏膠短纖，向中國及歐亞地區進行銷售。
今次獲洽購係內地業務。呢類咁專門的生意，散戶一般唔易理解，而且相信交易要進行一段時間。
由於呢種業務前期投入資金好大，若然交易成功，相信公司可以套現一筆，愛敲冷的股民，要等佢回番浸先好買入投機啦。
陸羽仁
金融High Tea 舊文