陸羽仁 BLOG 2014年10月13日
唯望業績
2014/10/13 上午 09:00:26
網誌分類: 經濟
美股上周四勁跌2%後，上周五再插。周五朝早仲頂得住，好淡爭持，但中午以後終於被淡友打沉，掉頭下滑，連續兩日大出血。杜指收跌115點至16544點；標普500指數跌22點1906點；納指勁挫102點，收報4276點。至上週五，杜指今年已經見紅，較去年底收市跌32點，標普500指數及納指分別仍有3.5%及2.4%進賬。
全球兵荒馬亂，中東有ISIS、東歐有俄烏糾紛、香港有佔中，再加上一個伊波拉病毒有擴散跡象，經濟方面，歐洲同中國經濟都唔掂，投資者仲唔嚇到腳仔軟？特別係歐洲經濟火車頭德國，真係每日都有壞消息登場。繼國基會(IMF)大幅睇淡德國今明兩年的經濟增長預期，德國剛出爐的經濟數據顯示，其生產力及出口大幅倒退，德國經濟部長上周五又表示，德國的經濟增長強勁已變得暗淡。上周四歐央行行長德拉吉又話即使推出QE救市，都未必掂，搞到歐洲股市，尤其係德國股市跌完又再跌。
雪上加霜嘅係國基會唱淡歐洲經濟前景後，上週五佢又話中國樓市急轉直下，或在短期內拖累亞太地區的經濟前景。中國9月百城房價中位數每平方米7081元人仔，較上月跌0.2%，較去年同期下跌0.66%。國基會認為中國房價指數如果持續下跌，將對許多亞洲的新興經濟體産生重大影響，國基會預期亞太地區2014年GDP增速為5.5%，明年為5.6%；不過，如果「中國房價下跌5%，將導致後一年的GDP下降1.3%。」
投資者見外圍好唔妥，雖然美國經濟未見有大問題，對美股前景自然無乜信心，沽貨潮湧現。上週五的交投量由上日的82億股增加至92億股，遠高過平均的大約70億股。正如Wunderlich Securities首席市場策劃師Art Hogan所講，當市場被「憂慮」氣氛濃罩，投資者只會睇到，甚至放大壞消息，例如地緣政治糾紛同德國嘅弱雞經濟報告，至於美國經濟基仍然唔錯，聯儲局可能無咁快加息，這些原本利好股市的消息，就無乜人理會啦。
不過，Art Hogan亦唔係睇得咁淡，佢認為隨著美企陸續公佈第三季業績，例如今個星期摩根大通及富國銀行將公佈業績，預計房貸及小型企業貸款在第三季有好表現，接住又有eBay同谷歌派成績表，eBay上周已完布9月同店銷售(SSS)增長8.9%。若美企盈利好，又將舒緩市場對外圍不景氣的壓力，投資者的注意力可能會由宏觀經濟環境，轉移到個別美企的盈利表現上面！盈利好過預期的話，投資氣氛好轉，美股大市又可以頂得下。
上周五納指跌超過100點或2.3%，主要受微芯科技(Microchip Technology)發盈警拖累。微芯科技第二季營收5.462億美元，去唔到市場預期的5.6億至5.759億美元的下限。由於它在9月中國方面的銷售額下降，因此發出發出第三季度業績預警，又話「行業回調已經開始」，微芯上週五股價勁挫12%，Intel, 微軟及思科亦受累大跌超過3.5%！科技股壓力到。
外圍腳軟，香港佔中情勢未好轉，大家捱吓先。
陸羽仁
回應(4) 我想回應
陸羽仁 BLOG 舊文