陸羽仁 BLOG 2014年10月28日
高盛睇好
2014/10/28 上午 10:02:51
網誌分類: 經濟
美股上星期升幅創了近22個月最大升幅，雖然歐洲銀行同德國經濟都唔係幾得，油價插落每桶80美元水平，能源股下挫，美股昨日仍然企得好穩，先回再反彈，未見投市場獲利回吐，反映投資者對美股後市仍然信心滿載。
睇股市恐懼指標VIX指數徘徊在15想16之間區間，亦可以見到投資者對股市未來30天的走勢仍然樂觀。
歐元區上周日進行銀行壓力測試，德國銀行基本過關，但全個歐元區共有25家銀行唔合格。重災區集中在意大利。測試結果顯示，歐元區130家銀行的不良貸款在2013年年底增加了1360億歐元至8790億歐元(以美元計，已超過一萬一千億美元)。這筆數量驚人的不良貸款相當於歐元區所有經濟産出的的9%。加上歐元區經濟唔得，區內經濟龍頭德國10月IFO商業景氣指數從9月的104.7下降至103.2，低過市場預期，更係2012年12月以來最低水平。
經濟報告使人對歐債危機重的憂慮升溫。歐洲股市繼續腳軟，其中德國股市跌0.9%，法國跌0.8%。歐股唔得，加上油價再創新低，拖累能源股，美股朝早回軟。
以為美股上星期升得咁勁，昨日會借勢回調，但事實係美股非常硬淨，跌少少已經走番上來。杜指尾市收復上午失地，由跌轉升，收市微升12點至16818點，標普500指數則收窄跌幅，跌3點，收報1962點，納指收市靠穩，微升2點至4486點。
美股硬淨，除了9月二手房簽約銷售指數較上月增長0.3%至105點，係今年第二高值之外，投資者對於聯儲局今個星期召開議息會議，對提早加息方面會表現得比較「鴿派」有關，由於連「鷹派」的聯儲局官員都認為有需要繼續比較寬鬆嘅貨幣措施，所以投資者比較傾向聯儲局的會後聲明會保留「相當長一段時期內」維持低利率的措辭。
而高盛則唱好大市，其首席股市場策略師考斯廷(David Kostin) 發報告，話考慮到美國經濟增長的持續性，預期標普500指數今年底目標2050點，之後嘅10個月內仲會漲到2150點，即係最多仍有大約10%的上升空間。高盛睇好，對大市都有少少刺激。
迪拜ADS證券公司首席市場策略師哈姆利(Nour Al-Hammoury) 則指出，聯儲局這次貨幣政策會議之後，今年內都唔會再開會。預計在聯儲局發布會議聲明之前，市場可能不會出現最近幾星期頻頻出現的大幅震蕩。市場唔會大上大落，投資者又可以睇定啲，唔使咁急住銷定利潤。
紐約原油昨日朝早下跌接近1美元至每桶80.6美元，拖累能源股及大市下跌，不過，油價好快又彈番上來，最新報每桶80.7美元。油價下跌的主要原因係高盛將西德克薩斯輕質原油(West Texas Intermediate crude oil)目標價由 每桶90美元下調至75美元；將英國布蘭特原油(Brent)由100美元降至85美元。幾個星期前，花旗銀行出了一個報告話頁岩氣(shale gas)的總成本大約係70美元至80美元，油價再低的話，就唔可能有人會開採。問題係油價即使跌到高盛的預期，似乎仍未見底。
全球最大產油國沙地已經宣布會減產，但由於美國近期生產量大升，美國現時每天生產9百萬桶原油，係全球產量10%，明年將增至每日1千萬桶，邊際的增幅已經去了美國，而不是沙地。不過，美國產量也會隨著油價下跌而減少，因為美國生產原油嘅成本比沙地還要高。不過伊斯蘭黑市倒賣石油，亦成為油價下跌的另一助力。
油價現在再跌入破位崖邊。油價跌得咁低，市場上已經有人開始擔心，低油價，對消費者固然係好消息，但對美國能源業及就業市場就係一個好大的打擊啦。
陸羽仁
回應(9) 我想回應
陸羽仁 BLOG 舊文