金融High Tea 2014年10月14日
彈吓有乜奇
2014年10月14日
中美股市從高位回落，港股開市受壓，在人人預期下挫之際，港股午後回升，搞到睇淡者有啲跌眼鏡。中環茶友話個市點解會升？我答個市跌咗咁多，彈吓有乜出奇，關鍵係彈完之後有無力再上啫。
滬港通仲未明朗
受歐美股市上周五低收拖累，恒生指數裂口低開，跌穿兩萬三大關，內地股市向下，質低港股，最多跌217點，低見22871點，但午後有報道稱港交所(388) 無收到滬港通推出計劃有變，掃走市場疑慮，令大市掉頭倒升185點高見23273點，一度重上250天牛熊分界線(23178點)及觸及10天線(23267點)，尾市升勢放緩，恒生指數收報23143點，升54點；國企指數收報10284點，跌16點，成交金額678億元。
中國太平(966) 宣佈供股，每100股供21股，供股價每股11.89元，發行不少於5.39億股供股股份，集資不少於約64億元，供股價較收市價折讓約33.7%，該股收市報16.22元，跌咗近一成。
個市跌唔落去，理由係港交所話滬港通推出計劃未變，唔止個市因此升番，港交所收報172.1元，倒升2.2元。究竟滬港通係咪10月開通，市場估計呢個星期就見真章，因為新機制唔係話開就開，要有安排配合，故此如果要喺月內開通，月中應該就會有公佈，故此呢幾日應該見真章。
上個星期金管局前總裁任志剛爆響口，話滬港通有機會延遲。陸羽仁收到風，同樣話滬港通通唔到。至於港交所話計劃未變，有人就懷疑呢啲係咪語言偽術呢？因為港交所同有關方面從來無公佈過開動日期，既然無正式計劃，咁又點有變呢？反正，家仲有幾日時間，佢無理由自己咁快就話要押後。
中國咁大，政治局常委會決定咗，傳到落嚟都要幾日。好似條蛇俾人斬咗個頭，仲可以向前衝幾呎，我怕滬港通已經變咗無頭蛇。股民都係唔好聽港交所講，以為滬港通無事。尤其係佔中家已經超過兩個星期，阿爺耐性始終有限，所以幾日局勢都可以有好大變化，陸羽仁講來講去都係嗰句，賺唔賺錢只係小事，最緊要唔好搞出人命同流血，就已經上上大吉！
雅居樂拖低民企內房
個市單日波幅有成四百幾點，焦點股份係主席已證實被監視居住的雅居樂(3383) ，公司雖然因此擱置供股抽水大計，股份復牌仍難逃重創，造3.95元，大跌17.19%。其他內房股亦下滑，富力地產(2777) 報7.8元，挫4.41%；綠城(3900) 造7.68元，挫3.64%。
雅居樂搞到咁大劑，高盛就發表報告，認為負面消息已反映在股價上，維持「中性」評級，削目標價6%至5.9元。報告下調雅居樂2014至2016年每股核心盈盈利預測20%、19%和19%，達至1.36元、1.18元及1.15元，主要由於取消供股計劃，估計2014年預期淨負債比率為87%。
我覺得其他內房股同樣跌咗唔少，揸住雅居樂換馬至其他內房股仲好啲。
民企內房股信貸同資金供應，短期難免受呢場風波影響。另一方面，內地樓價下跌，已經引起資產收縮同影響消費，中央接連為行政措施鬆縛，最近仲有少少救市招數出台，從政策上對內房開始轉趨有利，不過，在悲觀情緒主導下，市場氣氛無咁快好轉，股民想博反彈或者長線買貨，最好係保持耐心，同埋暫時都係留意有官方背景的公司穩陣啲。
陸羽仁
金融High Tea 舊文