金融High Tea 2014年11月25日
弄潮
2014年11月25日
內地突然宣佈減息，港股高開橫行，收市升咗四百幾點，叫做交足功課，但亦唔算有乜好大驚喜，估計內地增長唔會因為一次減息搞掂，需要繼續落藥，港股同樣唔會一轉就變大牛市，所以有機會食胡，低位買咗貨，趁高沽番啲出街，做吓股海弄潮兒，應該仲係有得諗的策略。
內地失驚無神減息，同熟悉內地情況的猛人傾起，佢話內地增長的確唔係咁靚仔，內地?家講緊要整頓政風，好多官員同民企老闆仍然係抱住多一事不如小一事的心態，喺咁情況下，佢估唔單止減息，遲啲可能仲會減埋銀行存款準備金率。
人民銀行同其他財金官員由講微刺激到?家減息，政策方向出現明顯轉變，都同內外原因有關。內因係經濟弱，外因係而家除咗美國外，歐洲、日本都猛印銀紙，同一時間，各地通脹似有若無，部份地方甚至出現通縮威脅，咁央行減息谷經濟就無乜顧忌，甚至有你唔印銀紙係你傻仔嘅想法。中國雖然怕印鈔太多，但手頭大把外匯，?家話要走出去，咁又使唔使自己咁手緊呢？
低撈內房已有胡食
對於人行減息，中金公司發佈報告唱好，該行形容貨幣政策終於回歸「正統」，有助降低經濟失速同金融體系風險，將逐步提升投資者風險偏好。
中金預計今次減息後，短期利率將逐步下降，今次減息只是一個明確放鬆周期的開始，對實體經濟和股市的影響不宜看得太淡。與此同時，對被人睇得較淡的周期性行業，都需要重新評估。
係人行減息刺激下，滬深股市連續第二日向好，上證指數創三年來新高。上證指數收報2532點，漲46點；深成指收報8577點，漲245點。各板塊幾乎全線上升，其中保險股急漲6%。
同內地一樣，恒指裂口高開446點，已經接近高位，全日收報23893點，升456點；國企指數收報10842點，升395點，成交增加至1053億元。各類股份中以息口敏感及股市相關板塊升得最多，包括內房、內地證券及內險股。我覺得減息可炒一轉，但唔好睇得太高，大市難改上落格局，不宜高追。
內房股升得最多，龍頭中國海外(688) 急飆11%，收報22.65元，為表現最佳藍籌；融創(1918) 考慮可能對收購綠城(3900) 作出調整，融創股價炒上17%，造7.21元，是港股通中升幅最大股份。早兩日如果見佢回得多，有聽陸羽仁講入啲貨，或者買啲內房，都等如收到份聖誕禮物，我覺得內房仲有得去多少少，可以等升高啲食胡。
相比下，內房殼股升勢更勁。萬達酒店發展(169) 因為傳出母公司萬達集團已取得中證監批覆，核准其香港上市計劃，萬達酒店大升68%；藍鼎國際(582) 飆升33%，收0.4元；金地商置(535) 都彈15%。
中廣核要搞得好好睇睇
減息利股市，對揸重股票的保險股有利。滬港通啟動，唔係咁多人北上買股，氣氛唔熱，國壽(2628) 本來唔係咁老嚟，但佢昨日就發威，借住減息上揚8%，造24.95元，強勢近排少有，其他內險股太保(2601) 、新華保險(1336) 都有相若升幅。
內地減息同樣有利新公司上市，所以雖然近年尾，仍有好多大型新股籌備緊，萬達商業地產已取得中證監批覆核准來港上市，預計將集資50至60億美元。更近係已開始路演的中廣核(1816) 傳發行88.25億股全新股，招股價範圍介乎2.43至2.78元，入場費為約2808元，周四(27日)開始公開發售，呢啲大路股點都要搞得好好睇睇，先至對得住捧場客啦！
陸羽仁
金融High Tea 舊文