金手指：雨傘分子執政時
■希臘問題是否已見光明，現階段難下定論。 資料圖片
噚日中午休市時孫柏文聽收音機某財經台，主持人講緊大市同外滙分析，講到差唔多時，就講希臘。女主持人話：「佢哋由二○○八年開始都話會破產啦，講到今日都係咁。」男主持就話：「其實之前佢哋GDP真係按年咁跌咗十幾percent，但去到舊年已出現增長1.9%。冇理由去到有增長先至話破產退出歐元區！」聽到呢到我熄咗部收音機。
希臘問題未解決
如果希臘已步向光明，經濟有增長，點解喺一月舉行嘅嗰場選舉，居然選咗班破產派執政？唔通啲希臘人民有如我哋咁，唔肯袋住先？歐盟有樣嘢好叻，就係呃人。甚至佢哋嘅委員會主席Juncker曾話過：「當事態嚴重時，就要講大話。」咁喺今日希臘身上有乜啟示呢？其實佢哋嘅GDP係咪增長百分之1.9？唔係。增長百分之1.9係要計埋通縮之後。即係每百收入跌兩蚊，但物價跌3.9元時，就會出現1.9「增長」。
若純粹講收入購買力，你可以用呢啲數據。香港大把人喺一九九七至二○○三年冇加薪，都因通縮而生活水平上升。但問題係希臘最當前嘅死線係來自債務，用呢種計埋通縮嘅計法係冇用。唔信問嚇嗰啲一九九七年買樓，之後負資產嘅業主。欠人嘅錢係唔會跟通縮咁減少，所以希臘係咪已見光明？小弟我真係冇咁嘅智慧去講。
二○○八年至今希臘理論上應破咗產，但就有如嗰個一九九七年入市嘅香港業主，佢不斷出新信用卡碌錢出來玩按揭供款一樣。債越來越多點搞呢？仲有二○○八年至今希臘政府不斷換人，先來聽北方指點嘅建制派，點知選舉滅黨。到選啲主流民主派，和理非非，到今年一月仲輸埋。現今呢批新人，若用香港作比喻就係雨傘運動嘅人，雜嘜左派，由左翼廿一到人力到班社工都有份。佢哋會唔會同北方派來嘅技術性官員來一次終極反枱？再過十幾日就知。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文