一周三件：津發唔憂冇運行
■天津發展係天津市旗艦，受惠國策，前景看俏。 資料圖片
天津發展（882）四個月質低咗三成，落番一年起步位，手頭上現金高達五十五億元，睇齊市值之餘，超級現金牛，加埋係天津市旗艦，博津發俾湊大。
受惠國策前景看俏
津發上年五月宣佈，以8.9億元出售所揸住44.7%權益王朝酒業（828）畀控股企業。連埋呢次出售，津發手頭現金上到五十五億元，就算扣埋25.3億元嘅銀貸，淨現金都講緊係近三十億元，大把銀彈喺手。
又上邊王朝酒業，停咗牌近兩年，呢次津發將王朝嘅權益賣畀阿媽，為津發帶嚟一次變現機會之餘，津發日後亦唔使為王朝任何潛在益損影響，重組嘅味道幾濃。
而喺上年五月，祖國證券報載，天津市國資委發佈，要求各市管企業，制訂國企股份制改革同上市工作五年規劃，當中，就包括確定計劃注入上市公司嘅核心業務資產，培育成熟後注入上市公司。津發係天津市旗艦，被湊大嘅條件好充份。
又喺祖國報載，天津濱海新區會加快佈局，計劃總投資1.3萬億元人仔，兼力爭到二○二○年時，新區經濟總量上到兩萬億元人仔。諗到嘅係，天津自貿區如火如荼，隨住呢區本身建立發展，加埋一帶一路重量級經濟國策，津發有齊地利優勢，唔憂冇運行。
津發呢期股價調整，現價（5.07元）幾乎跌到落一年嘅起步位，得0.5倍PB，五十五億元市值。場內地區旗艦深圳國際（152）家陣二百零三億元市值，1.3倍PB、上實（363）二百四十七億元市值，0.7倍PB、北控（392）家陣七百四十億元市值，1.37倍PB。津發真係咁唔值租？
買津發，當PB追番上上實水位，要見7.23元，講緊要升43%，上到北控PB水位咁計，津發係要翻過一番！
錢雋
細價股專家
本欄逢周二、三、五刊出
錢雋
一周三件 - 錢雋 舊文