魚樂無窮：東瀛遊破頂，Cheers
■東瀛遊埋單炒高一成。 資料圖片
權益披露顯示，惠理上周五增持東瀛遊（6882），數量唔多，10.8萬股咁大把，但足以令持股量增持5%需披露水平。金手指出動，跟風盤四方八面湧至，東瀛遊埋單炒高一成，創上市新高，跟定唔跟？
派息吸引 惠理也儲貨
今次惠理透過旗下高息股基金買貨，唐牛即時翻開東瀛遊招股書，真相大白了！原來東瀛遊招股時講明，起碼一半盈利嚟派息，回饋股東，以其預測去年每股盈利不少於0.13元計，意味每股派息最少0.065元，現價計有3.3厘息，要留意，呢個係打底價。進取少少以每股盈利0.15元、派息比率六成計，息率即刻去到4.6厘！金手指食指大動，不無道理。
所謂嘅進取業績，其實並非不可能任務。主打日本團嘅東瀛遊舊年十一月招股，預測數字估計以頭十個月計，當時日圓仲喺七算樓上，但之後食咗瀉藥，最新6.5算都穿埋，遊日人士節節上升，公司肯定豬籠入水，盈利超標可期。
睇股權架構，發行股數五億，大股東揸七成半，惠理同申銀共合揸近一成，街貨得七千五百萬股，又係貨疏價必揚格。圖表方面，兜個靚圓底後創新高，收貨收得八八九九。唔好忘記，東瀛遊現金流特強，最新市值九億唔夠，大把發揮空間，噚日大成交破頂，飲得杯落囉，Cheers！
唐牛
https://www.facebook.com/tongcow88
唐牛
魚樂無窮 - 唐牛 舊文