中環迷你裙：女股民的情人節
■聽日係情人節，大家都係疊埋心水諗下點𠱁另一半好過了。 資料圖片
稍稍回暖的早上，與W先生嘆個傳統西式早餐，咬一口鬆軟的牛角包，呷一杯香濃咖啡，為股海奮戰多日的自己打打氣，「禮拜六有咩做？」「情人節……」「係咩……」睡意未散，來不及將話收回去，W先生手上那熱騰騰的牛角包已跌在枱上，對Samantha而言，記股票冧巴，叻過記乜乜乜紀念日（前題是紀念日都是用上市公司個名來記）。
不要以為炒股的女人是不懂情趣，相反，她們非常識趣，每年情人節搶花，搶毛公仔，搶餐廳，聽聞半島間Gaddi"s兩個月前已爆滿，Sam日日喺報價機前搶住買貨，搶住沽貨，已經好累，食幾千蚊情人節套餐唔係仲要搶吖？明知服務多不對辦，名符其實焗住高位接火捧，呢啲嘢作為女股民係唔會做嘅。
講起接火捧，中國人最愛意頭嘢，最鍾意愛您一世（2014）、我愛您（520）呢啲靚冧巴，舊年有隻情人節概念股，風頭一時無兩，仲推出每位108元的情人節餐，咪就係「一生一世」翠華（1314），點解今年冇曬聲氣，用咗成年時間，股價蒸發掉一半，真心希望冇人懶浪漫買隻翠華畀女朋友當情人禮物，跌價的速度一定快過個Chanel袋，陰公豬。早前推介的股票好似綠地香港（337）、申洲國際（2313）都捱得住，但港股仍然腳震震，聽日係情人節，大家都係疊埋心水諗下點𠱁嚇另一半好過了。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文