中環在線：
情人節fb曬命 講心唔講金
■原來自製小禮物送畀情人，好多人like㗎。
自從有咗facebook（fb）之後，唔少人都鍾意上載食好嘢、出發去旅行等相片曬命，明天情人節，又係一年一度俾情侶狂曬命嘅重要日子。華華做咗個簡單嘅電話調查，發現最多人想曬嘅，並唔係乜嘢土豪東西，而係情人自製嘅小禮物，大家不妨諗諗佢喇。
■蔡雪瑩話，最鍾意男友送嘅一個自製木相架。 四成人愛自製小禮物
華華過去兩日成功用電話訪問一百一十六名市民，當中超過四成話想上載情人自製禮物上fb，其次係機場出發照，之後先至係一大束花，燭光晚餐同名貴首飾就冇咁多人like。
呢個結果似乎真係有市場。前新聞小花、𠵱家喺安永做公關嘅蔡雪瑩，跟從事金融業嘅男友拍拖一年左右。佢都話，最鍾意男友送嘅一個自製木相架，男友仲將二人嘅拍拖照剪剪貼貼喺上面，好有心思。佢都希望男友可以DIY一份情人節禮物送畀佢，「整一個蛋糕都好，即使買番來，話係自己整都算有誠意」。
經常不修邊幅、行為粗枝大葉嘅股評人孫柏文，原來有細心嘅一面，舊年情人節專登走去上堂，自製一個白銀吊墜送畀女友，一堂學費連材料，大約一千蚊，女友亦好like，冇投訴，兩人今年仲係一齊過情人節㗎。
其實都啱嘅，名貴手袋、首飾、去高級餐廳食飯呢類，有錢就做得到，擺上fb最多咪話畀人知道男友捨得花、花得起囉，誇張得滯，分分鐘仲俾人笑係土豪行為㖭，點都唔及得情人花心機、花時間自製一份禮物咁有意思，即使係自己焗個其貌不揚嘅蛋糕，應該都好呃like。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文