一周三件：賽特好嘢浮面
■蔣建強任主席的中國賽特，PE僅兩倍幾，股價低殘，值博率高。 資料圖片
中國賽特（153）主打結構鋼同預製組件，食住國策之餘，呢期仲拍上大孖沙上海城建，再有意搞埋熱爆嘅環保瓣數，家陣得兩倍PE，潛喺上市底，殘到離曬譜。
賽特係江蘇省第三大鋼結構同第二大預製組件嘅供應商。喺近年鋼材企業嗌曬救命，業績見血之時，賽特啱啱派二○一四年成績表，盈利都溫和增長5%，到4.6億元人仔，已經好唔錯。
PE勁低 價殘值博
又總理李克強新一期工作報告，講到明今年要加大城鎮棚戶區同城鄉危房改造力度，保障房新安排達到七百四十萬套。而喺嚟緊嘅日子，阿爺喺一帶一路國策下，未來十年陸續投資上萬億元喺大型基建項目。賽特兩瓣主打業務，都食到應。
好嘢仲未講完，上年中，賽特同上海城建集團簽署戰略合作框架協議，喺嚟緊嘅五年，喺主打瓣數上，進行戰略合作。又喺合適情況底下，雙方共有積極意願相互持股。
上網搵料，上海城建係祖國城市大型基建營運綜合商，連續十年榮列祖國五百強企業市政企業嘅第一位，年營業額高達五百億元人仔，巴巴閉。亦諗到，賽特拍到超級大孖沙，喺嚟緊日子，肥仔水。
賽特現價（0.69元），潛喺上市以嚟嘅低位，比二○一三年上市價1.03元，亦潛水32%，得2.8倍PE，喺上邊大優勢下，係咁意估賽特今年EPS增長一成咁大把，去到0.26元，PE得2.6倍。超殘價，勁低PE，老老實實，就算有意願，斷估都唔會喺呢啲位相互持股啩？
再講，賽特呢期計劃入股主打設計、製造同安裝節能及環保設備商江蘇晨力環保，一搞掂，又多個市場受落嘅元素。咪扯咁遠，買賽特，係咁意當翻半番到1.05元計，預測PE先得3.9倍，兼啱啱浮返上招股價。
錢雋
細價股專家
本欄逢周二、三、五刊出
錢雋
一周三件 - 錢雋 舊文