金融High Tea 2015年3月20日
騰訊鬥中移
2015年03月20日
聯儲局議息會議，對沖基金大鱷打晒開口牌，話如果加息太快，就有可能重蹈大衰退前後的境況，美股喺神經緊張下等聯儲局聲明，午後議息結果揭盅，表面睇一如市場所料，聲明中對利息調整前景棄用了「耐性」(patient)一詞，但主席耶倫在記者會上即派定心丸，表明無咗「耐性」字眼，不等如無耐性，強調加息要睇經濟。聯儲局聲明好清楚咁講4月會議不可能加息，除非見到勞工市場有更多改善，否則不會加息。
聯儲局調低大家對加息時間及幅度的預期，市場當成係好消息看待，杜指以全日最高位收市，收報18076點，升277點。港股昨日升了三百幾點，跟得叫做好足，算係叻仔。
港匯反彈利好股市
港股跟升跟得足，同時陸羽仁留意到，港元上個星期觸底後回升。上個星期，港匯最弱去過7.77，這亦是2012年以來的低位，跟住就回升，呢兩日反彈較為顯著。港匯上升可能係反映有錢入番本地，對於股市可以係一個利好訊號。
港元穩番，唔知同內地兩會後開始多咗政策解讀，強化番市場信心，以及人民幣匯價守番住有無關。總之，聯儲局議息聲明「偏鴿」，掃走美國短期加息憂慮，加上內地股市雖有整固壓力，出現好淡爭持。
有人話升市中出現咗騰訊(700) 鬥中移動(941) 的場面，前者股價升6.7%，以1.3萬億元市值的巨股，氣勢真係一時無兩，成為升市火車頭，一隻股份已向恒指進貢152點。中移動業績被指差過預期，全日挫3.4元，造100.1元，為表現最曳藍籌，早幾日個市仲係軟軟吓，中移動獨力殺上，當時已經覺得佢有啲托住個市嘅味道，?家氣氛好番，大笨象就即係被人丟番落嚟，高追一日唔見4皮。
騰訊業績報捷，第四季多賺50%，全年多賺54%符市場預期，公司透露有意將文學業務分拆上市，刺激股價猛飆。股價升得咁緊要，一來係撞正市場氣氛好；二來係兩會結束，提出互聯網+的概念，大力推動科網發展。市場急急追捧，搞到大象都會飛天。
李寧蝕錢照獲追捧
?家係業績公佈期，市場伺機有所動作，但點樣演繹業績，就有好大空間。好似李寧(2331) 去年虧損擴大至7.8億元人民幣，卻突獲投資者追捧，收造4.04元，急升近12%。有熟悉公司情況人士話，去年李寧盤數差咗，部份同公司大力整理帳目有關，喺咁情況下，反而有利公司今年爭取轉虧為盈，喺憧憬壞消息出完下，加上公司大搞智能概念，吸引到一批投資者捧場。
至於跟小米手環合作的智能跑鞋，李寧指將於今年第三季推出，共兩款產品，由於定位為大眾化，故當中主打的產品價格應低於300元人民幣。國家主席習近平話要大搞體育產業，體育用品股自然係各師各法，發揮政策概念！
陸羽仁
金融High Tea 舊文