魚樂無窮：靜靜起革命潛在靚殼
■盈進主要透過Walker Shop牌頭，喺中港台產銷各類型鞋履。 資料圖片
儲局調低今年利率預測，市場解讀為加息幅度有限，大摩更直指今年加息無望，一直被息魔抑壓嘅購買力全線爆發，大市成交突破千億。唔好忘記，阿爺二月減息時港股喺25000樓上，而家不明朗因素消除，都只係24400點，等A股回試3500時撈內險股及A股ETF，值博率極高。另外，港交所（388）沉寂多時，亦有機會成為大市破關第二梯隊。
Magnum（2080）復牌一如預期爆升，一石擊起千重浪，資金積極發掘下一家賣盤公司，從業務表現、股東架構、圖表走勢分析，盈進（1386）份屬頂頭大熱門。
盈進主要透過Walker Shop牌頭，喺中港台產銷各類型鞋履。眾所周知，而家零售業難撈，盈進亦不能倖免，近三年業績滿江紅，仲要越蝕越甘，慘情！最新中期再輸六千幾萬，全年埋年相信又過億。奇怪嘅事發生了，放榜後股價不跌反升，至今靜靜雞升足三成，擺明有後著！
事實上，盈進最新市值4.6億銀，兩大股東揸貨超過八成，聰明錢賭佢賣盤理由充份，再睇花紙，頭十大證券行揸咗90%貨源，乾到爆，一踢即起格局也！
雖然生意麻麻，但盈進依然有淨金揸手，財政夠健康，如果賣盤肯定有溢價，最新PB剛好一倍，睇睇Magnum，一易手就炒到上四倍，盈進有幾值博，大家心中有數吧！
唐牛
https://www.facebook.com/tongcow88
唐牛
魚樂無窮 - 唐牛 舊文