金融High Tea 2015年3月18日
短炒A股 中線揸H
2015年03月18日
港股近日好似被人點咗穴，美股上周末大跌，港股頂住唔郁，美股前晚勁彈，港股又唔係幾郁，就算上海股市創咗近期新高，恒指都係幾十點上落，只係H股跟內地升吓。
全球股市向好，中、美、歐攀升外，日、韓股市都向好，日經平均指數再創15年收市新高，市比市之下，港股變成超呆份子，不過陸羽仁就留意到，外資似乎有啲轉番睇好H股。
有大行開始睇好A股
瑞銀發表報告，分析北京在人大會議的政策方向，估計內地會推出轉趨積極政策，管理宏觀經濟增長風險，瑞銀因此決定上調國指今年底目標，由原來12,500點升至13,500點，相當預測今年市盈率8.1倍，較目前水平有潛在升幅近15%。
不同板塊中，該行看好內銀股，認為市盈率已處歷史低位，隨着內地政府推出債務置換等計劃，料有助行業復甦，是該行近兩年來首次建議增持內銀股，不過瑞銀同時下調多元化金融企業評級至「減持」。該行同時預料政府會有更多環保項目，提升投資回報。
在該行推介名單中，新加入中信銀行(998) 、光大國際(257) 及招商局國際(144) 至最喜歡H股名單內，指信行AH股價差逾40%；光大國際具高增長前景兼淨負債率僅15%；看好招商局料具國企改革概念。
陸羽仁覺得，依家A股已破位向上，若多番啲好似瑞銀這樣的外資睇好，H股可追落後。若短炒等回吐買A股基金，因為短期跟內地市跟得足啲。但如果睇中線，咁H股基金似乎就較抵買，因為比A股大落後。
外資對內地政策作出正面反應，A股已經起步作出反應，滬市午後升穿3500點水平，高見3504點，尾盤在金融股帶動下，上證綜指收市重上3500點關口。上證指數收報3502點，漲53點，再升1.6%；深成指收報12169點，漲151點1.26%。兩市成交大增至近1.12萬億元。
A股各個板塊幾乎全線上升。油價下插創6年低位，航運股表現標青，其中航空股平均漲5.5%。港股通股份個別表現標青，高銀地產(283) 、華南城(1668) 、阿里影業(1060) 及南方航空(1055) 漲逾一成。阿里巴巴大力搞娛樂事業，阿里影業炒味甚濃，開始吸引唔少散戶落疊。
資金跟大陸炒基建股
港股呆呆吓，主要係因為美國加息機會增加，令息口敏感股份無得發圍，加上濠賭股不斷尋底，拖低指數。恒生指數收報23901點，跌48點或0.2%；國企指數收報11837點，升24點或0.2%，都無力水，大市成交金額801億元。
大和料3月澳門博彩收入跌38%至40%，濠賭股沽壓未止，金沙(1928) 失守30元大關，為跌幅最大藍籌股，收造29.95元，挫3%，其他博彩股都下滑。由周焯華擔任主席的股份太陽世紀(1383) 股份急挫三成，董事會表示知悉公司股價下跌及成交量上升，經合理查詢後，確認並不知悉原因。
不過，資金開始跟住大陸炒基建股中鐵(390) 和中鐵建(1186) 合併計劃，基建股齊向好，中鐵造6.24元，上揚2.3%；中鐵建報9.69元，急升0.44元或4.8%。
個市有啲炒味，資金開始郁吓啲三、四線股仔，其中一類係新股，部份上市時反應唔熱烈，但股價又守住唔潛得水的股份，依家一浸浸炒上，擺明係想變身散戶樂園，炒炒供求。
陸羽仁
金融High Tea 舊文