中環迷你裙：玩股玩火一線間
■中美股市霸氣盡現，港股頓成孤兒。 資料圖片
中美股市霸氣盡現，港股頓成孤兒，基本因素欠奉、三唔識七股相繼蒲頭，原來市面上還有不少五億市值樓下的股票，個啲熟口面零售、濠賭股呢？都有上榜的，只是去咗五十二周新低那頁。對那些看圖表、細價股愛好者，簡直踏進伊甸園，隻隻動輒幾成升幅，驟看的確幾美味，但好似劃火柴般，往往最燦爛是點燃那一剎，下半場沒下文、翌日中伏者更多，最終燈蛾撲火，千祈唔好諗住賺盡，轉身記緊要快！
以為買A股ETF唔使憂？錯了！南方A50（2822）和安碩A50（2823）未必跟足，反而可吼滬深300（3188）。美滙強，最靠得住是賺美金的個股，首選敏華（1999），美國和中國業務分別佔呢隻傢俬股46%和四成，中期中美利潤分部分別增37%和22%，承著美國下半年快速復蘇，全年業績相信更有睇頭，加埋李克強講到明不再打壓樓市，炒內需，一加一的效果，分分鐘等於三。此股Samantha兩年半前推介過，當時超殘價1.8元，家陣翻近三番！仍對其前景充滿信心，第一，資金充裕，淨現金高達12.5億，第二，敏華近排密密回購，情況同二○一二年一樣，二月至今回購十次，涉資超過兩億，業績前如此大手筆回購，係好兆頭，創新高完全不覺意外。
Samantha
https://www.facebook.com/stocksamantha
本欄逢周三、五刊出
Samantha
中環迷你裙 - Samantha 舊文