中環在線：一田CEO用iPhone寫書
莊偉忠七萬字新書 邊行邊寫
■莊偉忠話新書係要怒插開無聊會議嘅「偽管理」。 李家皓攝
一田百貨行政總裁（CEO）莊偉忠以唔鍾意開會聞名，最近佢直情出咗本書叫《不開會的CEO》，洋洋灑灑七萬字寫佢經營一田嘅故事。早有聽聞莊偉忠鍾意邊行邊睇書，原來佢連寫書都係邊行邊寫，成本書都係用iPhone寫成，仲係用手寫板，難得佢又唔會寫到手指抽筋！
送乾冰險窒息死
莊偉忠噚日講解一田業務之餘，趁機推銷自己本新書，佢話，貪用手機寫書，可以隨時隨地打稿，夠方便。聞說，佢呢部手機係一田同事見佢原先用緊嗰部手機又殘又舊，於是夾錢送畀佢。
新書面世一個月左右，第一版3,000本去貨去得比預期快，將會加印2,000至4,000本。佢話，寫書唔係為開心，更加唔係為版稅，最想宣揚「以人為本」嘅管理哲學，即係同員工齊上齊落，毋須太功利。書中其中一個佢自己最鍾意嘅小故事，就係〈兩個傻仔送乾冰〉。
睇完呢篇，先知莊偉忠差啲因密室吸入二氧化碳而死。話說佢跟同事阿益因順路幫公司送乾冰，夾手夾腳托250公斤乾冰上車之後，遇上大塞車。佢哋怕乾冰融化，於是開大冷氣又反鎖車窗，差啲就聞二氧化碳窒息死，事後當然俾同事笑到面黃。但噚日佢講起呢個古仔，依然好興奮，叫大家記住睇。
佢喺新書又開宗明義怒插唯利是圖嘅「偽管理」，即開無聊會、行政程序只為讓老闆攞威等，問佢有冇俾人笑佢自成一家嘅小學雞管理學，佢就笑笑口咁話「邊夠膽喺我面前話我，做生意各師各法喇」。
對於新書銷量唔錯，將來會否考慮再出書？佢就耍太極，話明天嘅事明天先算喎。
日本零食「賣到爛」 轉向歐洲入貨
一田百貨由賣日本貨起家，但𠵱家市面上以日本貨作招徠嘅對手一街都係，噚日莊偉忠承認，「日本市場已經開發到爛」，所以變陣引入歐洲貨，主要向零食埋手。
雖然近排歐元貶值，莊偉忠話，匯率並唔係開拓歐洲市場嘅主因，而係貪佢「難做」，對手唔熟市場就好難模仿。公司買手去德國、西班牙美食展亂石投林咁搵供應商，咁啱當地供應商又好嚮往透過香港打入內地市場，雙方一拍即合。
對於可能引來對手加入競爭，佢就寸寸哋咁話「我聽到競爭兩個字就開心」，莊偉忠憧憬做大個餅之後，物流成本下降，到時一家便宜兩家著。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文