中環在線：陳智思姪女 賓架學切瓜
陳曉鈴幫手打理餐廳
■陳曉鈴𠵱家切起青瓜都有板有眼。 陳奕釗攝
政府搵亞洲金融（662）行政總裁陳智思做「降低食物中鹽和糖委員會」主席真係適合不過，陳智思除咗身形弗又注意飲食健康，舊年底仲跟姪女陳曉鈴（Stephanie）喺上環開咗間標榜少油兼用新鮮食材嘅The Kinnet Cafe。政府唔覺意幫陳智思做埋推廣㖭喎。
Kinnet主要由陳智思嘅姪女Stephanie打理。約30歲嘅Stephanie外表嬌滴滴，加上生於大富之家，爺爺陳有慶係著名泰國華僑，似係十指不沾陽春水嘅小姐，點睇都唔似學過廚。
曾於紐約學廚半年
佢承認，以前唔識煮飯，就連切菜都唔識，但因為由細到大都鍾意食，喺美國紐約嘅摩根大通工作兩年後，佢就決定喺紐約出名教煮法國菜嘅French Culinary Institute學廚半年，主要欣賞法國菜夠精緻，而呢間學校又容許佢由基礎學起。
Stephanie憶述，上堂之前連蘿蔔都唔識切，點知學校要求佢哋切蘿蔔，都要切到幾乎一樣，要用把尺去度準唔準嗰種。Stephanie起初上堂學得好吃力，同學見佢乜都唔識走去上堂，都投以奇怪目光。
上完半年課程之後，佢開始識煮簡單西餐，仲有機會去幫米芝蓮名廚Alain Ducasse嘅飲食集團做市務與推廣工作半年。點知佢爺爺一聽見佢去飲食集團工作，就誤以為佢去做廚師，急急叫佢返回香港幫手打理家族生意，加入亞洲金融。
Stephanie坦言，本身喜歡飲食業，幸得阿叔陳智思支持，可以喺上環開設針對50歲以上退休人士嘅健體中心「永健坊」，再喺裏面開設Cafe，「算係達成咗夢想一部份」。佢冇親自下廚，但所有菜式都係佢鍾意食㗎。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文