魚樂無窮：一隻潛力十足創板股
■電訊數碼假期前大棍破頂。圖為集團主席張敬石。 資料圖片
長假前本地創業板炒到癲，指數一星期升足一成，個股更係百花齊放，大有「三年不發市，發市當三年」嘅味道。有戰友問，大陸5萬億險資有排未落到嚟，係咪應該一棍起兩棍止呀？
正所謂炒股要炒前景，創業板久沉不起，難得有個十年一遇的好消息，肯定炒爆格。唔好忘記，八字頭股貨源多歸邊，炒上更加得心應手，就好似一條壓到實一實嘅彈弓，只要鬆一鬆手，即刻彈到九樓咁高。
上周推介新意網（8008），三日升16%，市盈率未夠20倍，未升夠。今日推介冷門股電訊數碼（8336），假期前大棍破頂，好戲在後頭。「個市熱辣辣，為乜畀隻冷嘢過嚟先？」四個原因逐點講。1.舊年5月上市，配售價1元，1年光景，至今累積升幅只得82%，唔少8字頭升幅講緊倍倍聲，電訊數碼落後幾條街！2.最新市值6.3億，大股東張氏家族持股75%，街貨少到不得了，再睇CCASS，流通貨源只得兩成，仲要由十大券商揸咗其中九成，要舞起話都冇咁易。3.公司近三季全部賺錢，中期仲有息派，升呢上主板只係時間問題，更有望惹來基金垂青。4.與香港電訊（6823）合營嘅SUN Mobile，上季推出高價新plan，在手機不離手嘅互聯網時代下，利錢只會越來越高。天時地利人和齊曬，電訊數碼呢鋪睇嚟有排玩。
唐牛
https://www.facebook.com/tongcow88
唐牛
魚樂無窮 - 唐牛 舊文