一周三件：盈大無限憧憬
■李澤楷任主席的盈大地產，隨時有變身或注資的可能。 資料圖片
小小超電盈（008）旗下嘅香港電視娛樂，當通訊局公佈佢哋成功攞到免費電視牌照後，市場就好有憧憬，電盈嘅股價上星期四裂口急彈係咁升。而小小超系內嘅盈大地產（432），得17億元市值，憧憬仲爆炸，起碼博翻一番到8.8元。
變身或注資有得諗
盈大喺去年以72.8億元出售北京盈科中心，喺還債後，淨現金仍然高達24.7億元。但喺龐大嘅現金回籠，兼阿媽揸超過70%下，盈大係冇派特別股息，銀彈照keep住。而呢個淨現金水平，係盈大街貨市值5.2億元嘅4.8倍！
就算盈大現價（4.4元）翻一番到8.8元，街貨市值都係得10.4億元，只係佔淨現金水平40%，而全面攤薄前PB，仍然得0.63倍。除笨有精，市場憧憬盈大俾阿媽私有化，唔係冇道理。
電盈揸咗盈大5.93億元紅利可換股票據。粗略咁計數，電盈若果行使嘅話，佔盈大股權到90%過外。若果電盈無啦啦全數兌換盈大股票，真係盞搞。但掉頭諗一諗，盈大有好似注資或變身呢類大動作，咁電盈大手換股，就變得有意義。又盈大賣完貝沙灣，真係等緊大製作，電盈keep住盈大呢大撼換股票據，就有啲味道。
又家陣資本市場，資金大得驚人，以俾阿里巴巴入主嘅阿里影業（1060，前身文化中國傳播）為例，市值高達600億元。所以，就算以盈大紅利票據獲全數換股計，市值只得69.8億元（散戶街貨市值，仍然得5.2億元），翻一番，市值都係得140億元。要上到阿里影業市值？盈大係要升7.7倍，到38蚊先到位！
以小小超嘅牌頭及實力，加上又啱啱喺中港大時代，盈大若果真係變身或注資，市值股價大暴漲，有幾奇？呢個憧憬，仲爆炸。
錢雋
細價股專家
本欄逢周二、三、五刊出
錢雋
一周三件 - 錢雋 舊文