智取大市：信義光能增長大平賣
深港通冇料到，港股噚日唔回吐都難，但恒指同個股走勢唔算太差，上星期五急彈嘅港交所（388）、本地券商股只係微跌，並冇打回原形，原因係，大家知道深港通呢啲消息遲早有得翻炒再翻炒，今日唔炒亦遲早有一日會炒起，沽嚟做乜？
明明之前滬港通都冇乜作為，點解大家今次
依然咁重視深港通呢？原因係嚟緊6月MSCI會檢討新興市場納入A股，聽聞目前基金意見都係五五波，納唔納入絕對有變數，如果呢個時候深港通落實，兼且滬港通有新嘅放寬額度措施，就會令MSCI新興市場指數納入A股嘅通過機會增加。跟蹤MSCI指數嘅基金買得A股，就有南水湧入中資股，直接受惠嘅A股，同埋大平賣嘅H股，都肯定有得升。
MSCI納入A股要等6月，但短線嚟講，只要有深港通消息，就會有憧憬，港交所同本地券商股，未來兩周有條件chok住升，噚日肯跌，就已經值得低吸。
其他股份方面，信義玻璃（868）之前發公告話可能拎8,000萬美金出嚟買信義光能（968）嘅換股債，呢個消息就刺激信義光能上個星期破頂，噚日早段曾經升超過半成，只不過因為港股大跌而升幅收窄至2%。
上望4.5元非難事
信義光能上市年半，過往只有信義玻璃減持信義光能，一減持後者股價就多數回吐，少有好似今次咁，有計劃買番轉頭。同一邏輯之下，證明管理層知道信義光能嚟緊好掂，股價亦有機會炒上。
信義光能主要做光伏玻璃同光伏電站業務，集團嘅光伏玻璃生產技術係全球最頂尖，加上內地今年光伏目標新增規模去到17.8吉瓦，相比2014年興建光伏電站規模10.6吉瓦，足足有68%上升空間，單計內地需求，信義光伏玻璃不愁冇增長。
至於光伏電站業務，唔少係喺舊年下半年同今年先至投入運作，即係話今年先有重大收入貢獻，大幅增長可以話係必然嘅事。
券商平均預測信義光能2015年每股盈利0.182元，同2014年比，上升117%，預測市盈率17.7倍。盈利爆升可測性超高，同騰訊（700）有得揮，呢種增長能力換轉拎喺A股度賣，50倍PE都覺得佢平。
信義玻璃增持信義光能呢轉順風車，認真坐得過，只要未來幾日大市回穩，信義光能應該又嚟爆上。現價即買，上望2015年市盈率25倍，上望4.5元非難事，跌破宣佈發換股債後低位2.8元止蝕。
晉佳
http://www.facebook.com/pages/晉佳/719009541518415
本欄逢周二刊出
晉佳
智取大市 - 晉佳 舊文