金融High Tea 2015年5月19日
打新熱潮
2015年05月19日
上星期大市借深港通有料到嘅傳言炒上，結果休市期間無消息，港股昨日開市即刻回番，一度跌三百幾點。深港通未有進展，港股調整唔出奇，實際上就算深港通就算真係有消息，個市係咪會升呢，抑或係借好消息出貨都難講。
深港通係咪落實，同港股升跌有幾
大關係，可以用「信者得救」嚟形容，即係投資者信佢利好，人人追住加注咪利好囉，否則就好似滬港通，通咗都可能無料到。
華泰基礎投資者搶眼
除咗深港通，有炒友仲拎其他概念作為睇好股市的理由，包括A股納入MSCI新興市場指數，有人甚至估下半年就出現，希望屆時有大批外資追蹤指數買入A股。中信銀行國際行長張小衛認為，內地A股將於兩年內，被納入MSCI新興市場指數，前提係人民幣很大機會年底被納入國際貨幣基金組織(IMF)旗下特別提款權(SDR)貨幣籃子。
張小衛預計，內地未來將會成為全球第一大經濟體，在世界的影響力將會顯著上升，預計到時人民幣影響力亦將相應提升。人民幣係咪納入SDR，象徵意義大過實際意義，不過，IMF受美國影響好大，佢係咪咁快肯放人民幣進入體制之內，就唔係咁易估。同樣地，A股納入MSCI新興市場指數係一個憧憬，究竟幾時實現，則涉及好複雜因素。
雖然大市回吐，但被視為今年集資王的華泰證券(6886) 正式宣佈今日起至22日公開招股。公司計劃發行14億H股，當中5%為公開發售，招股價介乎20.68至24.8元，每手200股，入場費5,009.98元。保薦人為摩根大通、瑞銀、華泰金融，以招股價中位數22.74元計，集資淨額料為311億元。
成份招股書最搶眼，係公司為今次上市共引入13名基礎投資者，當中包括富邦人壽、高瓴資本、工商銀行資產管理、網易創辦人丁磊、新華人壽及Sequoia Gopher分別認購2億美元；騰訊(700) 主席馬化騰、信達新諾石、Och Ziff、平安資產管理及海蘭之家分別認購1億美元；和惠理(806) 及Myriad分別認購1.5億及5000萬美元，合共認購19億美元，有六個月禁售期，睇落甚有概念，華泰證券(6886) 董事長吳萬善仲強調，今次H股招股區間較A股存有折讓，是綜合考慮與投資者磋商的結果及市場環境，同時希望為投資者留有投資空間，照睇今次會掀起打新股熱潮。
深港未通 借勢回調
香港等候大股上市，內地股市本周有20隻新股發行，今日起進入新股發行高峰，市場預期本輪新股凍結資金3萬億元人民幣。投資者憂慮資金面趨緊，上證指數收報4283點，跌25點；深成指收報14672點，跌22點。兩市成交1.26萬億元，較上周五縮減。不過創業板就再創新高，大升4.23%。
受內地偏軟同深港通無消息影響，港股低開30點後全日向下，午後一度低見27435點，挫387點，接近收市跌勢喘穩。恒指收報27591點，跌231點；國企指數收報13926點，跌83點，成交額1230億元。恒生指數有限公司宣佈國企成份股加入中廣核(1816) 及大連萬達(3699) ，前者升0.12元，報4.51元；大連萬達反跌0.3元，報69.3元。被剔走的威高(1066) 升0.02元，報6.77元，濰柴動力(2338) 跌0.4元，報28.75元。
陸羽仁
金融High Tea 舊文