女神tea time：食正百度大茶飯
■星美上月公佈與百度大搞O2O平台。 資料圖片
內地科網各路大佬，近年密密南下買嘢。喺科網收購潮下，最新值得憧憬嘅係星美控股（198）。公司上個月公佈，與百度進行戰略合作計劃，噚日新鮮滾熱辣公佈新進展，推出「星美百度聯名卡」，同百
度大搞線上線下（O2O）平台。
呢單刁就咁聽，已經有兩個概念可以炒。首先，今次星美自2012年已搞緊O2O影院平台，今次行動代表呢隻文化股，要進一步擴展佢嘅電子商貿業務。據公佈，呢張卡唔單止好似一般影院實體卡咁畀你增值，仲會推出「星美生活餘額理財」、「電影眾籌」，即係涉足埋理財產品！大家唔係唔知餘額寶呢類產品吸金力幾咁驚人，仲要加埋電影概念，有曬gimmick，星美認真開拓多條財路。同時，呢排升爆廠嘅滙銀（1280）同埋暢豐（1039），統統都係借電商概念發圍，星美呢個時候公佈，順理成章更當炒。
單係今次合作，目標會員數目已達2,000萬！今次星美嘅拍檔大家唔可以睇小，因為百度堪稱中國嘅Google。百度搵得星美做得partner，當然唔會得一步，相信星美未來陸續會有好消息公佈。正如前文所講，目前各科網概念爭住買地盤，做生不如做熟，如果我係百度，有日想買地盤，我一定會搵間合作過嘅先囉。
Fifi
http://www.facebook.com/lovefrystock
本欄逢周二、四刊出
Fifi
女神tea time - Fifi 舊文