一周三件 - 錢雋 2015年5月20日
一周三件：信達等坐火箭
■侯建杭任主席的中國信達，估值平值博率高。 資料圖片
2007年瘋牛期，內銀內券股嘅PE，炒到上30、40倍樓上，場內信達（1359），明年預測PE僅得7倍，已經係平霸嗰隻。基本條件追落後，信達翻一番，只係碎料。又以非常態瘋牛期資金市準則，信達係可以升兩、三倍。
記得嘅係2007年一個港股直通車，內銀內券係坐火箭，以工行（1398）為例，2007年嘅高峯期，PE炒到上32倍，中信証券A股（滬600030）更加上到45倍PE。睇到嘅係，加埋資金市呢個因素，重磅嘢一樣升到甩轆，PE可以高到無譜。
追落後 值博率高
睇番信達，場內專業評估，信達明年EPS0.53元同0.64元，現價（4.79元）明年預測PE，得7.5倍咁大把。上邊中信証券A股及另一隻海通證券A股（滬600837），明年預測PE，係講緊19倍！
同其他內券股一樣，信達主打資產管理，同證券瓣數，食住阿爺放水減息，享受呢潮政策帶嚟嘅增值良機。啱啱喺上星期，阿爺開腔，話會積極開展不良資產證券化。信達作為不良資產管理嘅四大龍頭之一，比起內券，就多咗一重增值/獲利嘅優勢。
又在超級牛底下，信達仲係得超抵單位數PE，一年嚟累升29%咁大把，莫講話落後內券股同期普遍貼近100%升幅，比起H指同期近44%升幅，信達亦跑輸九條街，殘到無朋友！
睇港交所（388）中央結算紀錄，北水最新去到本周一，所揸信達H股，去到2.45億股，又係滬港通開波以嚟，貼近最高持倉水位。
買信達，當追番內券股明年18倍PE嘅水位，係講緊要升150%，到12蚊。又超級牛，可以去到好癲，以2007年翻版睇，信達炒到上30倍PE，係講緊要升300%，去到近20蚊水位。
錢雋
細價股專家
本欄逢周一、三、五刊出
錢雋
一周三件 - 錢雋 舊文